बर्दियाको गेरूवा गाउँपालिका–५ झबहीकी १० वर्षीया भारती (एन्जल) देउवाको हत्या आरोपी पक्राउ परेका छन्।
इलाका प्रहरी कार्यालय शान्ति बजारका प्रमुख प्रहरी निरीक्षक मदन गुरूङले प्रारम्भिक अनुसन्धानबाट एन्जलको हत्या स्थानीय २२ वर्षीय एक युवकले गरेको स्वीकार गरेका छन्।
जिल्ला प्रहरी कार्यालय बर्दियाले बुधबार नै पत्रकार सम्मेलन गरी एन्जल हत्यामा संलग्न व्यक्तिलाई सार्वजनिक गर्ने तयारी गरेको छ।
इप्रका शान्ति बजारबाट आरोपितलाई जिल्ला प्रहरी कार्यालयतर्फ लैजाने तयारी हुँदैछ।
कानमा लगाएको दुई आनाको सुनको मुन्द्री र घाँटीमा लगाएको दुई तोलाको चाँदीको सिक्री लुटनका लागि आफूले एन्जलको हत्या गरेको पक्राउ परेका युवकले प्रहरी समक्ष बयान गरेको प्रहरी निरीक्षक गुरूङले बताए।
इलाका प्रहरी कार्यालय राजापुरका प्रमुख डिएसपी कबिन्द्रसिंह बोहराले पनि बालिकाको कानका गहना लुट्नकै लागि हत्या भएको प्रारम्भिक अनुसन्धानबाट खुलेको बताए।
घटना अनुसन्धानमा प्रत्यक्ष संलग्न इप्रका शान्ति बजारका प्रमुख प्रहरी निरीक्षक गुरूङका अनुसार असोज १७ गते दिउँसो खोलामा माछा मार्न गएका ती युवकले एन्जल एक्लै साइकलमा आइरहेको देखेका थिए।
‘ऊ त्यो दिन दिउँसो बुढीखोलामा हेल्का थापेर माछा मार्न गएको रहेछ,’ प्रहरी निरीक्षक गुरूङले भने, ‘सुनका मुन्द्रा लगाएकी एन्जल एक्लै साइकलमा आइरहेको देखेपछि ती लुट्न हत्या गरेको हुँ भन्ने बयान उसले गरेको छ।’
एन्जल सानीआमासँग बुटवलमा बसेर अध्ययन गरिरहेकी थिइन्। कक्षा ४ मा अध्ययनरत उनी दसैं मनाउन सानीआमासँगै बर्दियास्थित घरमा आएकी थिइन्।
गेरूवा – ३ गणेशपुरस्थित ठूली आमाको छोरा काका नाता पर्ने बलबहादुर रोकायाको १८ गते बिहे थियो। एन्जल बिहे घरबाट कपडा लिन भनेर साइकलमा घरतर्फ जाँदै गर्दा उनको हत्या भएको थियो।
असोज १८ गते दिउँसो गेरूवा गाउँपालिका–५ मूलपानी बुढीखोला क्षेत्रमा एन्जलले प्रयोग गरेको साइकल पानी सुकाएपछि फेला परेको थियो।
एन्जलले लगाउने चप्पल झाडी सफा गरेपछि फेला परेको थियो। एन्जलको शव सोही खोला किनारमा गाडेको अवस्थामा सोमबार दिउँसो फेला परेको थियो।
एन्जलको शव पोष्टमर्टमका लागि बाँकेको नेपालगञ्ज पठाइएको छ।
सम्बन्धित समाचार:
सानीआमासँग बुटवलमा बसेर पढ्ने एन्जल दसैं मान्न आएकी थिइन् घर
१७ गतेदेखि हराएकी बालिकाको हत्या, शव भेटियो गाडिएको अवस्थामा
-1746009348.jpg)
