अमेरिकाको सर्वोच्च अदालतले सिकागो सहरमा नेसनल गार्डका सैनिक परिचालन गर्ने राष्ट्रपति डोनाल्ड ट्रम्पको प्रयासलाई रोकेको छ।
आप्रवासीलाई सामूहिक-देशनिकाला गर्ने आफ्नो नीति कार्यान्वयन गरिरहेका संघीय अधिकारीहरूको सुरक्षाका लागि ट्रम्पले अक्टोबरमा सिकागोमा नेसनल गार्ड परिचालन गर्ने आदेश दिएका थिए।
विपक्षी डेमोक्र्याटिक पार्टीको सरकार रहेको इलोनोय राज्य र सिकागो सहरका सरकारले सो कदम विरूद्ध मुद्दा हालेका थिए।
सुरूमा एक संघीय अदालतले नेसनल गार्डको परिचालन रोक्न अल्पकालीन आदेश दिएको थियो। पुनरावेदन हुँदै सो मुद्दा सर्वोच्च अदालत पुगेको थियो।
सो मुद्दामा मंगलबार फैसला गर्दै सर्वोच्चले नेसनल गार्डको परिचालन गर्न ट्रम्पलाई रोकेको छ।
सर्वोच्चका ९ जना न्यायाधीशमा ट्रम्पको रिपब्लिकन पार्टीको राष्ट्रपतिले नियुक्त छ जनाको बहुमत भए पनि ट्रम्प सरकारले सो मुद्दा हारेको छ।
ट्रम्प स्वयंले अघिल्लो कार्यकालमा नियुक्त गरेका दुई न्यायाधीश र रिपब्लिकन पार्टीको राष्ट्रपतिले नियुक्त गरेका प्रधान न्यायाधीशले समेत उनको विपक्षमा फैसला गरेका छन्।
सर्वोच्चले नेसनल गार्डलाई सक्रिय बनाउन ट्रम्पले प्रयोग गरेको कानुन सम्भवतः नियमित सशस्त्र बलहरू—सेना, नौसेना, वायुसेना र मरिन्स—शान्ति सुरक्षा कायम राख्न अपर्याप्त भएको अवस्थामा मात्र लागू हुने टिप्पणी गरेको छ।
अमेरिकामा विद्रोह वा गृह युद्ध भएमा १८ औं शताब्दीको विद्रोह ऐन भनिने युद्धकालीन कानून प्रयोग गरेर राष्ट्रपतिले देशभित्र सेना वा नेसनल गार्ड परिचालन गर्न सक्छन्।
त्यसको साटो निश्चित परिस्थितिहरूमा राष्ट्रपतिलाई नेसनल गार्ड परिचालन गर्न अधिकार दिने अर्को कानून प्रयोग गरेका थिए।
त्यो कानूनले पनि तीन परिस्थितिहरूमा मात्रै नेसनल गार्डलाई परिचालन गर्न संघीय सरकारलाई अधिकार दिन्छ।
पहिलो, जब कुनै देशले अमेरिकामाथि आक्रमण गर्छ वा आक्रमणको खतरा हुन्छ।
दोस्रो, जब संघीय सरकारको अधिकारविरूद्ध विद्रोह हुन्छ वा विद्रोहको खतरा हुन्छ।
तेस्रो, जब राष्ट्रपति नियमित सुरक्षा निकायको प्रयोग गरेर संघीय कानूनको कार्यान्वयन गर्न असमर्थ हुन्छन्।
तर सो कानूनले त्यसरी नेसनल गार्ड परिचालन गर्न राज्यको गभर्नरमार्फत आदेश जारी हुनुपर्ने उल्लेख गरेको छ। तर ट्रम्पले भने डेमोक्र्याटिक सरकार रहेका सिकागो सहित धेरै सहरमा गभर्नरलाई जानकारी नै नदिई नेसनल गार्ड परिचालन गर्ने निर्णय लिएका थिए।
ट्रम्पको पहिलो कार्यकालको अन्त्यतिर मे २०२० मा एक श्वेत प्रहरी अधिकारीले अश्वेत जर्ज फ्लोयडको घाँटीमा घुँडाले थिचेर मिनियापोलिसमा हत्या गरेपछि देशैभरि विरोध प्रदर्शन हुँदा पनि ट्रम्पले सेना नै परिचालन गर्ने कुरा गरेका थिए।
तर उनले सेना वा नेसनल गार्ड कुनै पनि परिचालन गरेका थिएनन्।
दोस्रो कार्यकालमा भने आप्रवासी नीति कार्यान्वयन गर्नका लागि उनले धेरै सहरमा नेसनल गार्ड परिचालन गर्ने निर्णय लिएका छन्। ती सहर र राज्यले उनको निर्णयविरूद्ध विभिन्न अदालतमा मुद्दा हालेका छन्। त्यसमध्ये सिकागोमा नेसनल गार्ड परिचालन गर्ने निर्णयविरूद्ध परेको मुद्दामा सर्वोच्चले फैसला गरेको हो।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
