नेपाल ट्रष्टको नाममा दर्ता रहेको जग्गा लिजमा दिँदा अनियमितता भएको प्रकरणमा पक्राउ परेका ट्रष्टका तत्कालीन सचिव अर्जुनकुमार कर्की र सहसचिव लेखबहादुर कार्कीलाई धरौटीमा छाड्न आदेश भएको छ।
जिल्ला अदालत काठमाडौंले बुधबार पूर्वसचिव अर्जुनकुमारलाई ६ लाख र सहसचिव लेखबहादुरलाई १० लाख रूपैयाँ धरौटीमा छाड्न आदेश दिएको हो।
लेखबहादुर र अर्जुन कुमारले धरौटी बुझाउन नसकेमा थुनुवा पुर्जी दिई थुनामा राख्न सम्बन्धित कारागारमा पठाइदिन भनेर आदेश दिइएको जिल्ला अदालतको काठमाडौंका सूचना अधिकारी दीपककुमार श्रेष्ठले जानकारी दिए।
प्रहरीको केन्द्रीय अनुसन्धान ब्युरोले ठगी र आपराधिक विश्वासघातको मुद्दामा सहसचिव लेख बहादुरलाई कात्तिक २१ गते र अर्जुन कुमारलाई कात्तिक ३० गते पक्राउ गरेको थियो।
चितवनको भरतपुर महानगरपालिका–१५ बस्ने सहसचिव कार्की हाल अवकाश प्राप्त कर्मचारी हुन्।
अनुसन्धानअनुसार काठमाडौं महानगरपालिका–१ दरबारमार्गस्थित नेपाल ट्रष्टको जग्गा थामसेर्कु ट्रेकिङ प्रालिलाई लिजमा दिने क्रममा नियमानुसार सञ्चालक समितिको निर्णयबिना र बिनाआधार अर्को कित्ता पनि थप गरी लिज सम्झौता गरिएको थियो।
मिति २०७४ साल जेठ १४ गते गरिएको उक्त सम्झौतामा ३ वर्ष निर्माण अवधिको बिओटी मोडलका लागि भएको ठाउँलाई ३० वर्षका लागि लिजमा दिने निर्णय गरिएको थियो।
सो क्रममा ट्रष्टका अधिकारी, कर्मचारी र अन्य व्यक्तिहरूले गैरकानूनी लाभ लिएको प्रारम्भिक अनुसन्धानले देखाएको प्रहरीले जनाएको छ।
-1746009348.jpg)
