बंगलादेशमा बम विस्फोट हुँदा एक युवकको मृत्यु भएको छ।
सन् २०२४ मा तत्कालीन प्रधानमन्त्री शेख हसिनालाई अपदस्त गरेको विद्यार्थी आन्दोलनको 'फ्रन्टलाइनर' उसमान हादीको हत्या भएको घटना नसेलाउँदै बम विस्फोटको घटनामा अर्का एक युवकको मृत्यु भएको हो।
मृत्यु हुनेमा सायम नाम गरेका २१ वर्षीय युवकको मृत्यु भएको ढाकाबाट प्रकाशित हुने अनलाइन ढाका ट्रिब्युनले जनाएको छ।
बुधबार दिउँसो ढाकाको मोघबजारको मोर भन्ने ठाउँमा फ्लाइओभरबाट फ्याँकिएको बम युवकको माथि खसेर विस्फोट भएको थियो।
विस्फोटपछि युवकको घटनास्थलमै मृत्यु भएको ढाका ट्रिब्युनले जनाएको छ।
विस्फोट बंगलादेशको मुक्तियोद्धा संघको केन्द्रीय कार्यालय रहेको भवन नजिकै भएको हो।
मृत्यु भएका युवक एउटा निजी कार डेकोरेसन कम्पनीमा कार्यरत कर्मचारी हुन्।
ढाका प्रहरीका उपकमिश्नर मशुद आलमका अनुसार सायमको घटनास्थलमै मृत्यु भएको हो। घटनामा को संलग्न थिए भनेर चाहिँ खुलेको छैन।
उनका अनुसार सायम घटना हुँदा एक्लै सडकमा हिँडिरहेका थिए। उनी खाजा किनेर फर्कँदै गर्दा फ्लाइओभरबाट बम खसेर उनीमाथि विस्फोट भएको थियो।
-1746009348.jpg)
