ब्राजिलका पूर्वराष्ट्रपति जाइर बोल्सोनारोको लगातारको बाडुल्की निको पार्न चिकित्सा प्रक्रिया गरिएको छ।
उनलाई निरन्तर बाडुल्की लागे पछि ब्रासिलियाको एक अस्पतालमा शनिबार चिकित्सा प्रक्रिया गरेर सफल उपचार गरिएको उनका चिकित्सक टोलीले पत्रकार सम्मेलनमा जानकारी दिएको छ।
सो प्रक्रियामा 'फ्रेनिक नर्भ’लाई निस्क्रिय पार्ने काम गरिएको ब्लुमबर्गले जनाएको छ।
घाँटीदेखि फोक्सो मुनि रहेको ‘डायफ्राम’ सम्म फैलिएको सो नसाले बाडुल्की लगाउने काममा मुख्य भूमिका खेल्छ।
शनिबार उनको फ्रेनिक नर्भको दाहिने तर्फको भागलाई निस्क्रिय पारिएको थियो। देब्रे तर्फको भागलाई निस्क्रिय पार्न सोमबार दोस्रो पटक प्रक्रिया गरिने चिकित्सक टोलीले जानकारी दिएको छ।
यसअघि बिहीबार बोल्सोनारोको हर्नियाको शल्यक्रिया पनि गरिएको थियो। यो हर्निया सन् २०१८ को चुनावी अभियानका क्रममा उनीमाथि भएको छुरा प्रहारको परिणाम थियो। चिकित्सक टोलीका अनुसार उक्त शल्यक्रिया बिना कुनै जटिलता सम्पन्न भएको थियो।
बिहीबारको शल्यक्रिया अघि बोल्सोनारोले एक विज्ञप्ति जारी गर्दै सन् २०२६ को राष्ट्रपतीय निर्वाचनका लागि आफ्ना छोरा फ्लाभियोको उम्मेदवारीलाई समर्थन गरेका थिए।
बोल्सोनारो माथि २०२२ को चुनाव हारेपछि शासन उल्ट्याउन खोजेको भनेर सर्वोच्च अदालत २७ वर्ष कैद सजाय सुनाएपछि अहिले जेलमा छन्।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1756794700.JPG)
-1746009348.jpg)
