बेलायती प्रहरीले सार्वजनिक पदमा रहँदा दूराचार गरेको आशंकामा राजा चार्ल्सका भाइ एन्ड्रयू माउन्टब्याटन-विन्डसरलाई बिहीबार पक्राउ गरेको छ।
लण्डनको पश्चिमी क्षेत्रहरू हेर्ने थेम्स भ्याली प्रहरीले पूर्वराजकुमार एन्ड्रयूले सन् २०१० मा बालिकाहरूलाई वेश्यावृत्तिमा लगाउने भनेर दोषी ठहरिएका यौन अपराधी जेफ्री एप्स्टिनलाई व्यापारिक प्रतिवेदनहरू पठाएको भन्ने उजुरीहरूको मूल्यांकन गरिरहेको बताएको भनेर समाचार संस्था एपीले जनाएको छ।
एप्स्टिनका बारेमा अमेरिकामा भएको अनुसन्धानसँग सम्बन्धित लाखौँ पृष्ठका कागजातहरू सार्वजनिक भएपछि यो मूल्यांकन सुरू गरिएको हो।
बेलायती कानुन अनुसार प्रहरीले एन्ड्रयूको नाम सार्वजनिक गरेको छैन। तर उनलाई पक्राउ गरिएको हो भनी सोधिएको प्रश्नमा प्रहरीले ६० बढी उमेरका एक व्यक्तिलाई पक्राउ गरिएको वक्तव्यतर्फ संकेत गरेको छ। एन्ड्रयू अहिले ६६ वर्षका छन्।
विस्तृत मूल्यांकनपछि सार्वजनिक पदमा रहँदा गरिएको भनिएको दूराचारको यस आरोपमाथि अहिले अनुसन्धान सुरू गरिएको र यस कथित अपराधको अनुसन्धान गर्न साझेदारहरूसँग काम गरिरहँदा अनुसन्धानको अखण्डता र निष्पक्षतालाई जोगाउनु महत्त्वपूर्ण रहेको कुरा वक्तव्यमा उल्लेख गरिएको छ।
बेलायती प्रहरीले यस मामिलामा रहेको जनचासोलाई बुझेको र उपयुक्त समयमा थप जानकारी गराउने बताएको छ। यसैबीच एन्ड्रयूको घरबाहिर नाम नलेखिएका प्रहरी गाडीहरू र सादा पोसाकका अधिकारीहरू भेला भएको देखिने तस्बिरहरू इन्टरनेटमा सार्वजनिक भएको भनेर पनि एपीले लेखेको छ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
