बाँकेमा प्रेमिकाको हत्या आरोपी युवक पुर्पक्षका लागि थुनामा पठाइएका छन्।
माघ १ गते डुडुवा गाउँपालिका–३ वनकट्टीकी २१ वर्षीया बसन्ती गोडियाको शव सडे गलेको अवस्थामा घर नजिकैको पुरानो र प्रयोगविहीन इनारभित्र फेला परेको थियो।
बसन्तीको हत्या सोही गाउँका २५ वर्षीय राकेश बर्माले पुस १ गते मध्यराति गरेको प्रहरी अनुसन्धानबाट खुलेको थियो।
बाँके जिल्ला अदालतले आइतबार बसन्तीका हत्या आरोपी राकेशलाई पुर्पक्षका लागि कारागार पठाउन आदेश दिएको हो। मुद्दाको अन्तिम किनारा नलागेसम्म हत्या आरोपी राकेश कारागार पठाइएका हुन्।
बाँकेका प्रहरी प्रवक्ता डिएसपी दीपक पातलीले अदालतको आदेश अनुसार राकेशलाई आइतबार नै कारागरमा चलान गरिएको बताए।
प्रहरी अनुसन्धानबाट पुस १ गते मध्यराति भेट्न भनी घर बाहिर बोलाएर राकेशले प्रेमी बसन्तीको घाँटी लगायत शरीरका विभिन्न भागमा हँसिया प्रहार गरी वीभत्स हत्यापछि शव इनारभित्र फालेको खुलेको थियो।
जिल्ला प्रहरी कार्यालय बाँकेको मुद्दा शाखामा कार्यरत केशव केसीका अनुसार अर्कै व्यक्तिसँग प्रेममा परेको बहानामा राकेशले आफ्नी प्रेमीलाई योजनाबद्ध रूपमा आफूले भेट्ने ठाउँमा बोलाएर हत्यापछि शव राति नै इनारमा फालेको स्वीकार गरेका थिए।
बसन्तीको हत्या गर्ने योजना अनुसार राकेशले घरबाटै हँसिया लगेर गएको प्रहरी अनुसन्धानबाट खुलेको छ।
‘मैले सुरूमा सम्झाउने उद्देश्यले राति उनलाई भेट्न बोलाएको थिएँ र जति सम्झाउन खोज्दा पनि उनले सोही केटासँग बिहे गर्ने कुरा दोहोर्याइरहिन्,’ प्रहरी निरीक्षक केसीले राकेशको भनाइ उद्धृत गर्दै भने, ‘त्यतिबेला मैले आफूलाई सम्हाल्न सकिनँ र साथमै लगेको हँसियाले घाँटी लगायत विभिन्न ठाउँमा आक्रमण गरी हत्यापछि शव इनारमा फालिदिएको थिएँ।’
शव सडेगलेको अवस्थामा फेला परेको हुँदा सुरूमा हत्या गरिएकी युवतीको पहिचान गर्न प्रहरीलाई समय लागेको थियो।
स्थानीयले प्रहरीसमक्ष गाउँकी कुनै पनि युवती वा महिला हराएको भन्ने जानकारीसम्म दिन सकेका थिएनन्। तर, गाउँकै बसन्ती महिना दिनअघि भारतको नानपारास्थित मामा घरमा गएको हुँदा गाउँमा नरहेको कुरा स्थानीयले गरेका थिए। त्यसपछि प्रहरीले नानपारामा बस्ने बसन्तीका मामा रामजेश गोडियासँग सम्पर्क गर्दा उनी त्यहाँ नपुगेको भन्ने तथ्य पत्ता लगाएको थियो।
त्यो सूचनाका आधारमा परिवारका सदस्यले बसन्तीका कपडा र गहनाबाट शवको पहिचान गरेका थिए। बसन्तीले मोबाइल प्रयोग गर्ने भए पनि त्यसमा लाग्ने सिमकार्ड प्रयोग गर्थिनन् भन्ने परिवारजनले प्रहरीलाई बताएका थिए।
तर, घटना अनुसन्धानबाट बसन्तीले मोबाइलमा सिमकार्ड पनि प्रयोग गर्ने गरेको तथ्य प्रहरीले पत्ता लगाएको थियो। प्राविधिक विश्लेषणका आधारमा बसन्ती पुस १ गते मंगलबार रातिदेखि सम्पर्कविहीन बनेको तथ्य पत्ता लागेको थियो।
परिवारजनले पनि मंगलबारदेखि नै बसन्ती घरमा नरहेको बताएका थिए।
स्थानीयसँगको सोधपुछ र प्राविधिक तथ्य विश्लेषण गर्दा बसन्ती र गाउँकै राकेशका बीचमा प्रेम सम्बन्ध रहेको तथ्य पत्ता लागेको थियो। त्यो तथ्यका आधारमा प्रहरीले राकेशको सुक्ष्म निगरानी र अनुसन्धान थालेको बतायो। घटना विश्लेषणका आधारमा राकेशलाई प्रहरीले माघ ११ गते पक्राउ गरेको थियो।
डीएसपी पातलीका अनुसार राकेशले प्रहरीसमक्ष प्रेममा उत्पन्न खटपटका कारण आफूले नै बसन्तीको धारिलो हतियार प्रहार गरी हत्या गरी फस्ने डरले प्रयोगविहीन पुरानो इनारमा शव फालेको स्वीकार गरेका थिए।
राकेश र हत्या गरिएकी बसन्ती दुवै अविवाहित हुन्। उनीहरूका बीचमा प्रेम सम्बन्ध चल्दै आएको कुरा प्रहरी अनुसन्धानबाट खुलेको छ। जिल्ला अदालत बाँकेले राकेशलाई ज्यानसम्बन्धी कसुरमा घटना अनुसन्धान गर्न सोमबार सात दिनको म्याद दिएको छ।
-1746009348.jpg)
