तनहुँको आँबुखैरेनी गाउँपालिकाले नयाँ शैक्षिक वर्षका लागि संघीय सरकारले तय गरेको समय तालिकाभन्दा अघि नै भर्ना अभियान र पठनपाठन सुरू गर्ने निर्णय गरेको छ।
गाउँपालिका अध्यक्ष शुक्र चुमानद्वारा हस्ताक्षरित सूचनामा गाउँपालिकाभित्रका सबै सामुदायिक तथा संस्थागत विद्यालयहरूमा वैशाख २ गतेदेखि भर्ना अभियानसँगै नियमित कक्षा सञ्चालन गर्न निर्देशन दिइएको छ।
यसअघि शिक्षा तथा मानव स्रोत विकास केन्द्रले २०८३ सालको भर्ना अभियान वैशाख १५ गतेबाट र नियमित पठनपाठन वैशाख २१ गतेबाट सुरू गर्ने निर्णय गरेको थियो। केन्द्रको सो निर्देशन चैत २६ गते प्राप्त भए पनि गाउँपालिकाले स्थानीय अवस्थालाई ध्यानमा राख्दै समय अगाडि सारेको जनाएको छ।
नेपालको संविधान र प्रचलित कानुनअनुसार आधारभूत तथा माध्यमिक तहसम्मको शिक्षाको व्यवस्थापन गर्ने अधिकार स्थानीय तहलाई रहेको उल्लेख गर्दै गाउँपालिकाले सोही अधिकार प्रयोग गरी शैक्षिक क्यालेन्डरअनुसार कार्यक्रम अघि बढाइएको उल्लेख गरेको छ।
गाउँपालिकाले सबै विद्यालयलाई उक्त निर्णय कार्यान्वयन गर्न आग्रह गर्दै भर्ना अभियानलाई प्रभावकारी बनाउन सरोकारवालासँग समन्वय गर्न पनि निर्देशन दिएको छ।
सूचनामा अभिभावक, विद्यार्थी तथा विद्यालय प्रशासनलाई समयमै तयारी पूरा गरी नयाँ शैक्षिक सत्रलाई व्यवस्थित रूपमा सञ्चालन गर्न आह्वान गरिएको छ।
-1746009348.jpg)
