कपिलवस्तु प्रहरीले स्रोत नखुलेको १४ लाख भारतीय रुपैयाँ सहित एक युवकलाई नियन्त्रणमा लिएको छ।
मायादेवी गाउँपालिका– ८ बरकुलपुरका २१ वर्षीय अभिषेक गुप्ता स्रोत नखुलेको १४ लाख भारतीय रुपैयाँ सहित पक्राउ परेको जिल्ला प्रहरी प्रवक्ता डिएसपी रिपेन्द्रकुमार सिंहले सेतोपाटीलाई बताए।
सोमबार दिउँसो कपिलवस्तु नगरपालिका–२ स्थित जमुवार पुलबाट पूर्ववाट पश्चिमतर्फ जाँदै गरेको लु १८ प ८७४७ नम्बरको गुप्ताले चलाएको मोटरसाइकललाई पछ्याउँदै प्रहरीले उनलाई पक्राउ गरेको थियो।
गोप्य सूचनाको आधारमा प्रहरीले गुप्तालाई झन्डै ६ किलोमिटर बढी पिछा गरी साधा पोशाकका प्रहरीले नियन्त्रणमा लिएको डिएसपी सिंहले बताए।
चेकजाँचका लागि रोक्ने क्रममा गुप्ता मोटरसाइकल सहित भागेका थिए। प्रहरीले पिछा गर्दै कपिलवस्तु नगरपालिका– १ स्थित जिल्ला प्रशासन कार्यालय तौलिहवा नजिकैबाट गुप्ता पक्राउ परेका थिए।
पक्राउपछि खानतलासीका क्रममा मोटरसाइकलको डिक्की र सिटमुनि गुप्ताले लुकाइछिपाइ राखेको अवस्थामा भारतीय ५०० दलका २४ गड्डी नोटहरू बरामद भएको डिएसपी सिंहले बताए।
बरामद भारतीय रुपैयाँ थप अनुसन्धान र कारबाहीका लागि राजस्व अनुसन्धान कार्यालय बुटवल पठाइएको छ।
-1746009348.jpg)
