प्रधानमन्त्री बालेन शाहले गाएको १२ वर्ष पुरानो 'र्याप ब्याटल' युट्युवबाट हटाउन दिइएको उजुरीमा प्राविधिक टिमले अनुसन्धान गरिरहेको साइबर ब्युरोले जनाएको छ।
प्रधानमन्त्री शाहले गाएको १२ वर्ष पुरानो 'र्याप ब्याटल' मा लैंगिक तथा यौनिक अल्पसंख्यक समुदायको आत्मसम्मानमा हमला गरेकाले हटाउनुपर्ने भन्दै शुक्रबार साइबर ब्युरोमा उजुरी परेको थियो।
लैंगिक तथा यौनिक अल्पसंख्यक समुदायका पूर्व संविधानसभा सभासद सुनिलबाबु पन्तले इमेलमार्फत दिएको उजुरी शुक्रबार दर्ता भएको हो।
उजुरी दर्ता भएसँगै उक्त र्याप ब्याटलबारे प्राविधिक टिमले अनुसन्धान गरिरहेको साइबर ब्युरोका एसपी दिलिपकुमार गिरीले जानकारी दिए।
'उजुरी दर्ता भएसँगै हाम्रो टेक्निकल टिमले यसबारे बुझिरहेको छ,' उनले भने, 'अनुसन्धान भइरहेको छ।'
शनिवार र आइतबार कार्यालय बन्द भएकाले थप गृहकार्य हुन सकेको छैन। सोमबारदेखि कार्यालय खुल्ने भएकाले थप काम अघि बढ्ने एसपी गिरीले बताए।
उनका अनुसार उक्त र्याप ब्याटलमा निवेदकले भनेझैं समुदाय लक्षित केही शब्द भए युटयुवमा हटाउन माग गरिन्छ। तर अहिले नै के गरिन्छ भनेर भन्न सकिँदैन।
-1776591960.jpeg)
-1746009348.jpg)
