काठमाडौंका विभिन्न स्थानमा रहेका सुकुम्बासी वस्ती सरकारले आजदेखि खाली गर्दैछ।
सरकारले सुकुम्बासी समस्या समाधानको विधि र प्रक्रिया ठाडै उल्लंघन गर्दै डोजर चलाएर काठमाडौंको थापाथली, मनोहरा र सिनामंगल क्षेत्रका सुकुम्बासी वस्तीमा शनिबारदेखि खाली गर्न लागेको हो।
शनिबार ठूलो संख्यामा सुरक्षाकर्मी परिचालन गर्ने तयारी पनि छ।
जिल्ला प्रशासन कार्यालय काठमाडौंले बिहीबार जारी गरेको सूचनामा शनिबार बिहान ६ बजेदेखि वस्ती खाली गरिने उल्लेख छ।
वस्तीमा बसोबास गर्दै आएकाहरूलाई शुक्रबारसम्म छाड्न भनिएको थियो। थापाथलीको सुकुम्बासी वस्तीका केही मानिसहरूले शुक्रबार दिउँसो नै आफ्नो सामान सारेका थिए।
कोठा नपाउनेहरू भने सामान घरबाहिर निकालेर बसेका थिए।
प्रशासनले 'अटेर' गरेर बसे काठमाडौं महानगरपालिका र प्रहरीले संयुक्त रूपमा कारबाही गरी त्यस्ता संरचना भत्काउने चेतावनी दिएको छ।
सरकारले भने बस्ती खाली गर्न बल प्रयोग नगर्ने पनि बताएको छ।
सरकार प्रवक्ता एवम् शिक्षामन्त्री सस्मित पोखरेलले शुक्रबार पत्रकार सम्मेलनमा वस्तीमा बल प्रयोग नगरिने बरू सुरक्षित स्थानान्तरण गरिने बताएका थिए।
सुकुम्बासीहरूलाई कहाँ स्थानान्तरण गर्ने भन्ने विषयमा भने सरकारले केही सार्वजनिक गरेको छैन।
प्रधानमन्त्री बालेन शाहले पनि सुकुम्बासीहरूलाई सुरक्षित स्थानान्तरण गर्ने बताएका थिए।
उनले अतिक्रमणकारी र सुकुम्बासी छुट्याउने र देशभरका वास्तविक सुकुम्बासीका लागि प्रक्रिया पुर्याएर यथाशक्य चाँडो जग्गा वितरण गर्ने बताएका छन्।
-1746513231.jpg)
-1746009348.jpg)
