चौधरी फाउण्डेसनले रसुवा बाढीबाट प्रभावित नुवाकोटको त्रिभुवन त्रिशुली माध्यमिक विद्यालयलाई तत्काल सञ्चालनमा ल्याउन सहयोग गर्ने निर्णय गरेको छ।
बाढीका कारण प्रभावित विद्यार्थीहरूलाई विद्यालयमा फर्काई उनीहरूको मनोवैज्ञानिक असर कम गर्न एवं अध्ययनलाई अगाडि बढाउन चौधरी फाउण्डेसनले आपत्कालीन सहयोग गर्न लागेको हो।
चौधरी फाउण्डेसनले उक्त विद्यालयमा डिजिटल क्लासरूमको अवधारणाअनुसार कक्षा सञ्चालन गर्ने व्यवस्था मिलाउन लागेको हो।
यसका लागि आवश्यक पर्ने स्मार्ट बोर्ड, डेस्कटप, ल्यापटप, प्रोजेक्टर तथा इन्टरनेटको व्यवस्था मिलाइने फाउन्डेशनले जनाएको छ।
त्यसैगरी, कक्षाकोठामा फर्निचरको व्यवस्था मिलाउन काठमाडौंमा तयारी अवस्थामा रहेका फर्निचर विद्यालयमा पुर्याउने तयारी छ।
विद्यार्थीहरुका लागि स्कूल ब्याग र स्टेसनरी सामग्री पनि उपलब्ध गराउन लागेको छ।
विद्यालयका प्रधानाध्यापक राजेन्द्र दवाडीले विद्यालय संचालनमा ल्याउन वैकल्पिक भवनको व्यवस्था मिलाउन लागिएको बताएका छन्। सोही भवनबाट तत्काल विद्यालय संचालन गर्न भने चौधरी फाउण्डेसनले सहयोग गर्ने घोषणा गरेको हो।
त्रिभुवन त्रिशुली माध्यमिक बिद्यालयमा करिव एक हजार छ सय विद्यार्थी अध्यनरत थिए। भदौ १० गतेको वाढीले उक्त विद्यालय ध्वस्त बनाएको छ।
‘हामी बाढी प्रभावित क्षेत्रका बालबालिकाहरूलाई मनोवैज्ञानिक असरबाट जोगाउन र उनीहरूको पढाइप्रति संवेदनशील बन्दै हाम्रो आपत्कालीन सहयोग कार्यक्रमअन्तर्गत त्रिभुवन त्रिशुली माध्यमिक विद्यालयमा जतिसक्दो चाँडो पठनपाठन अगाडि बढाउन चाहन्छौं,’ फाउण्डेसनका अध्यक्ष निर्वाण चौधरीले भने, ‘हामी जति सक्दो छिटो स्कूल सञ्चालन गर्न सकियोस् भन्ने चाहन्छौं। सोहीअनुसार हाम्रा भौतिक एवं शैक्षिक सामग्रीहरू विद्यालयलाई हस्तान्तरण गर्नेछौं।’
विद्यालय सञ्चालन तत्काल अगाडि बढाउने विषयमा चौधरी ग्रुपका अध्यक्ष विनोद चौधरी र विद्यालयका प्रधानाध्यापक राजेन्द्र दवाडीबीच भदौ १५ गते छलफल भएको थियो। सोही छलफलअनुसार चौधरी फाउण्डेसनले तत्काल विद्यालय सञ्चालन गर्ने वातावरण तयार गरेको हो।
‘चौधरी फाउण्डेसनले विद्यालय सञ्चालनका लागि गर्नुभएको सहयोगले हाम्रा विद्यार्थीहरूको जीवनमा सकारात्मक प्रभाव पर्नेछ। हामीले वैकल्पिक भवनको बारेमा कुरा अगाडी बढाइसकेका छौं। भवन व्यवस्थापन हुनासाथ चौधरी फाउण्डेसनबाट भौतिक एवं शैक्षिक सामाग्री प्राप्त हुनेछन्,’ प्रधानाध्यापक दवाडीले भने।
