बंगालको खाडीमा विकसित न्यून चापीय क्षेत्र नोभेम्बर १६ (सोमबार) साँझसम्म चक्रवाती आँधीमा परिणत हुन सक्ने भारतको मौसम विज्ञान विभाग (आइएमडी)ले जनाएको छ।
शुक्रबार बिहान साढे ५ बजे दक्षिणपूर्वी बंगालको खाडीमा न्यून चापीय क्षेत्र बनेको हो।
अण्डमान सागरको मध्य भाग र आसपासका अण्डमान तथा निकोबार टापु क्षेत्रमा विकसित वायुमण्डलीय चक्रवातीय प्रणालीको प्रभावले न्यून चापीय क्षेत्र बनेको आइएमडीले जनाएको छ।
आइएमडीका अनुसार उक्त प्रणाली उत्तरपश्चिम दिशातर्फ अघि बढ्ने र नोभेम्बर १४ सम्ममा थप विकसित भएर स्पष्ट न्यून चापीय क्षेत्रमा परिणत हुने सम्भावना छ।
त्यसपछि नोभेम्बर १५ मा यो प्रणाली डिप्रेसनमा परिणत हुने र नोभेम्बर १६ को साँझसम्म चक्रवाती आँधी बन्न सक्ने पूर्वानुमान छ।
यस प्रणालीको प्रभावले अण्डमान सागरमा नोभेम्बर १३ र १४ तथा दक्षिणपूर्वी बंगालको खाडीमा नोभेम्बर १३ देखि १६ सम्म प्रतिघण्टा ५० किलोमिटरसम्मको हावाको गति रहने र झोक्कासहित ६० किलोमिटरसम्म पुग्न सक्ने विभागले जनाएको छ।
त्यस्तै, दक्षिणपश्चिमी बंगालको खाडीमा नोभेम्बर १५ देखि १७ सम्म तथा मध्य बंगालको खाडीमा नोभेम्बर १६ र १७ मा हावाको गति प्रतिघण्टा ५५ किलोमिटरसम्म पुग्न सक्नेछ।
झोक्कासहित हावाको गति प्रतिघण्टा ६५ किलोमिटरसम्म पुग्ने अनुमान छ।
भारतको ओडिसामा सतर्कता
सम्भावित चक्रवातलाई ध्यानमा राख्दै भारतको ओडिसा सरकारले तटीय र दक्षिणी क्षेत्रका जिल्लाका अधिकारीलाई सतर्क रहन निर्देशन दिएको छ।
ओडिसाका विपद् व्यवस्थापनमन्त्री सुरेश पुजारीले मौसम विभागले प्रणालीबाट ओडिसामा पर्न सक्ने प्रभावबारे औपचारिक पूर्वानुमान नगरे पनि सरकारले पूर्वतयारी थालेको बताएका छन्।
सम्भावित प्रभावको समीक्षा गर्न मन्त्री पुजारीले वरिष्ठ अधिकारीसँग बैठक गर्ने तयारी पनि गरेको भारतीय अखबार हिन्दुस्तान टाइम्सले जनाएको छ।
यसैबीच, भुवनेश्वरस्थित मौसम केन्द्रले नोभेम्बर १८ र १९ मा केन्द्रपाडा र जगतसिंहपुर जिल्लामा भारी वर्षाको सम्भावना रहेको भन्दै पहेँलो सतर्कता जारी गरेको छ।
नोभेम्बर १८ र १९ मा बालासोर, भद्रक, जाजपुर, केन्द्रपाडा, जगतसिंहपुर, कटक, केओन्झार, मयूरभञ्ज, गजपति, गञ्जाम, पुरी, खुर्दा र नयागढ जिल्लामा चट्याङसहित मेघगर्जन र प्रतिघण्टा ३० देखि ४० किलोमिटरको गतिमा हावा चल्न सक्ने पूर्वानुमान छ।
त्यस्तै, नोभेम्बर १९ र २० मा रायगढा, गजपति, गञ्जाम र पुरी जिल्लामा भारी वर्षा हुन सक्ने भन्दै ती क्षेत्रमा पनि पहेँलो सतर्कता जारी गरिएको छ।
यो कति शक्तिशाली बन्छ भन्ने कुराले नेपालमा यसले प्रभाव पार्छ कि पार्दैन भन्ने तय गर्नेछ।
अहिले चक्रवात बनिननसेकका कारण मौसम पूर्वानुमान महाशाखाले यसबारे कुनै सूचना सार्वजनिक गरेको छैन।
यसअघि अर्नब चक्रवातको प्रभावले नेपालमा पनि भारीदेखि धेरै भारी वर्षा भएको थियो।
