लैंगिक हिंसाविरूद्ध जनचेतना अभिवृद्धि गर्न तथा पीडितको न्यायमा पहुँच सुनिश्चित गर्न यस वर्ष पनि ‘लैंगिक हिंसा विरूद्धको १६ दिने अभियान’ सञ्चालन गरिने भएको छ।
आगामी मंसिर ९ गतेदेखि २४ गते (सन् २०२६ नोभेम्बर २५ देखि डिसेम्बर १०) सम्म देशभर विभिन्न सचेतनामूलक कार्यक्रमसहित यो अभियान सञ्चालन हुन लागेको हो।
हरेक वर्ष नोभेम्बर २५ देखि डिसेम्बर १० सम्म मनाइने यस अन्तर्राष्ट्रिय अभियानको यस वर्षको अन्तर्राष्ट्रिय नारा 'UNiTE to End Violence Against Women and Girls: Ensure justice, protect survivors, end impunity' (महिला तथा बालिकाविरूद्ध हुने हिंसा अन्त्यका लागि एकजुट हुँदै न्याय सुनिश्चित गर्ने, पीडितको संरक्षण गर्ने र दण्डहीनताको अन्त्य गर्ने) तय गरिएको छ।
यसै सन्दर्भमा नेपालको राष्ट्रिय नारा 'लैंगिक हिंसा अन्त्यका लागि ऐक्यबद्धता: पीडितको संरक्षण, दण्डहीनताको अन्त्य र न्यायको सुनिश्चितता' तय गरिएको छ।
पीडितको सुरक्षा, सम्मान र संरक्षण सुनिश्चित गर्नुका साथै हिंसाका घटनामा विद्यमान दण्डहीनताको अन्त्य गर्दै कानुनी न्याय स्थापित गर्नु अभियानको मुख्य उद्देश्य रहेको छ। महिला तथा बालिकामाथि हुने सबै प्रकारका हिंसाविरुद्ध सामूहिक प्रतिबद्धता र ऐक्यबद्धता जुटाउन अभियानले विशेष प्राथमिकता दिएको छ।
लैंगिक हिंसामुक्त समाज निर्माणका लागि राज्यका निकाय, नागरिक समाज, स्थानीय समुदाय तथा सम्पूर्ण सरोकारवाला पक्षको साझा प्रयास, जिम्मेवारी र सक्रिय सहभागिता अपरिहार्य रहेको सन्देशयस अभियानले प्रवाह गर्ने अपेक्षा गरिएको छ।