धादिङको रुबीभ्याली गाउँपालिका–४ कलदाङमा गाडी दुर्घटना हुँदा एक महिलाको मृत्यु भएको छ।
गएराति करिब १:५५ बजे लापाबाट बोराङतर्फ जाँदै गरेको बागमती प्रदेश ०२०३३ च ७१६९ नम्बरको बोलेरो गाडी उकालो सडकमा अनियन्त्रित भएर करिब ४०० मिटर तल खसेको हो।
दुर्घटनामा रुबीभ्याली गाउँपालिका–४ बोराङकी ६६ वर्षीया छेनेन तामाङको घटनास्थलमै मृत्यु भएको सशस्त्र प्रहरी बलका सह-प्रवक्ता डिएसपी शैलेन्द्र थापाले जानकारी दिए।
दुर्घटनामा चालकसहित ९ जना घाइते भएका छन्। घाइतेहरूमा सात वर्षीय बालकदेखि ४० वर्षसम्मका यात्रु छन्।
घाइते हुनेमा रुबीभ्याली गाउँपालिका–४ का कान्छीमाया तामाङ, पिटर तामाङ, आमोष तामाङ, कमल घले, मिजोङ तामाङ, विमल तामाङ र चेरोङ तामाङ छन्।
त्यस्तै, गाडीका चालक धादिङको खनियाबास गाउँपालिका–१ का ४० वर्षीय डम्बर तामाङ र महोत्तरीको बर्दिबास नगरपालिका–११ का २५ वर्षीय ललित बोम्जन पनि घाइते भएका छन्।
घाइतेमध्ये आमोष तामाङ, मिजोङ तामाङ र चालक डम्बर तामाङको अवस्था गम्भीर रहेको छ।
अन्य घाइतेको अवस्था मध्यम रहेको डिएसपी थापाले जानकारी दिए।