नेपालले अन्तर्राष्ट्रिय क्रिकेट परिषद् (आईसीसी) को नयाँ टी-२० वरियतामा सुधार गरेको छ। आइतबार सार्वजनिक नयाँ वरियतामा नेपालले एक स्थान सुधार गर्दै शीर्ष १२औं स्थानमा उक्लिएको छ।
नेपाल आयरल्याण्डलाई उछिन्दै १२औँ स्थानमा उक्लिएको हो। दक्षिण अफ्रिकासँगको टी-२० सिरिज गुमाएपछि आयरल्याण्ड एक स्थान तल खस्किएको हो।
नेपालले अन्तिम पटक गत वैशाखमा घरेलु भूमिमा सिरिज खेले यता कुनै पनि क्रिकेट खेल्न पाएको छैन। क्रिकेट नखेलेको लामो समय हुँदा पनि नेपालले वरियतामा भने सुधार गरेको हो।
नयाँ टी-२० वरियतामा पनि इंग्ल्याण्ड शीर्ष स्थानमा कायमै छ। दोस्रो, तेस्रो, चौथो र पाँचौ स्थानमा क्रमशः भारत, न्यूजिल्याण्ड, पाकिस्तान र अष्ट्रेलिया छन्। यस्तै छैठौं स्थानमा दक्षिण अफ्रिका, सातौंमा अफगानिस्तान, आठौंमा वेष्ट इन्डिज, नवौंमा श्रीलंका,दशौंमा बंगलादेश र ११ औं स्थानमा जिम्बाम्बे छन्।
नेपालभन्दा पछि १३औं स्थानमा आयरल्याण्ड, १४औं स्थानमा स्कटल्याण्ड र १५ औं स्थानमा युएई छन्।
