सिद्धार्थ बैंक नेपाल प्रिमियर लिग (एनपिएल) मा जनकपुर बोल्ट्सले पहिलो हार ब्याहोरेको छ। कीर्तिपुरस्थित त्रिवि मैदानमा सुदूरपश्चिम रोयल्ससँग ७२ रनले पराजित भएपछि जनकपुरको चारको जितको ऋंखला तोडिएको हो।
दुवै टोलीले पाँच पाँच खेल खेल्दा चार चार खेलमा जित निकालेका छन्।
बुधबार दिनको पहिलो खेलमा सुदूरपश्चिमले दिएको १२४ रनको सामान्य लक्ष्य पछ्याएको जनकपुर १२.१ ओभरमा ५१ रनमै अलआउट भयो।
खराब सुरुवात गरेको जनकपुरका सुरूवाती ६ ब्याटरले दोहोरो अंकमा रन जोड्न सकेनन्। घातक बलिङ गरेको सुदूरपश्चिमले चार ओभरभित्रमा जनकपुरको ५ विकेट लिएको थियो। त्यतिबेला जनकपुरले २८ रन जोडेको थियो। बाँकी ५ विकेट गुमाउँदा उसले २३ रन मात्र जोड्न सक्यो।
ओपनर तथा कप्तान अनिलकुमार साहलाई सइफ जइबले दोस्रो ओभरमा शून्यमा बोल्ड गरे। तेस्रो ओभरमा आसिफ शेखलाई दीपेन्द्रसिंह ऐरीले ४ रनमा आउट गरे। यो ओभरमा हर्ष थाकरलाई हरमित सिंहले ५ रनमा रनआउट गरे।
अर्को ओभरमा लाहिरु मिलन्थालाई इशानले पाण्डेले आरिफ शेखबाट क्याच गराए। त्यसपछि ऐरीले जेम्स निशमलाई ४ रनमा बोल्ड गरेका थिए।
सातौं ओभरमा शुभ कंसाकारलाई शून्यमा इशान पाण्डेले ब्रान्डन माक्मलेनबाट क्याच गराए। अर्को ओभरमा अरनिको यादवलाई हरमित सिंहले आउट गरे। त्यसअघि शेर मल्ल नरेन साउदबाट शून्यमा आउट भएका थिए। जोसुआ ट्रम्सले जनकपुरका लागि सर्वाधिक १३ रन जोडे।
बलिङमा सुदूरका हरमित सिंह, ऐरी र इशानले दुई दुई विकेट लिए। सइफ जइब, नरेन साउद र स्कट कुगेलेइनले एक एक विकेट लिए।
कीर्तिपुरस्थित त्रिवि मैदानमा टस जितेको जनकपुरले फिल्डिङ रोजेपछि पहिले ब्याटिङ गरेको सुदूरपश्चिमले ९ विकेटको क्षतिमा १२३ रन मात्र जोड्न सक्यो।
सुदूरपश्चिका लागि ओपनिङ ब्याटर विनोद भण्डारीले ३३ रन जोडे। उनले ३७ बलमा ३ चौका र १ छक्का प्रहार गरे।
अर्का ओपनर सइफ जइबले २१ रन बनाए। दुईबीच पहिलो विकेटका लागि ७.४ ओभरमा ५५ रनको साझेदारी भयो। त्यसपछि भने सुदूरका ब्याटर कुनै पनि बेला सम्हालिन सकेनन्।
हर्ष थाकरको बलमा आउट जइब आउट भएपछिको अर्को ओभरमा अमेरिकी ब्याटर हरमित सिंहलाई शेर मल्लले १ रनमै बोल्ड गरे।
मल्लले १२औं ओभरमा विनोद भण्डारीलाई आउट गरेका थिए। अर्को ओभरमा अरनिको यादवले कप्तान दीपेन्द्रसिंह ऐरीलाई शून्यमै आउट गरे। दुई ओभरपछि ब्रान्डन माम्कमलेनलाई ११ रनमा अरनिकोले नै आउट गरेका थिए।
१८औं ओभरमा किशोर महतोले तीन विकेट लिएका थिए। इशान पाण्डेलाई १७ रन र आरिफ शेखलाई ६ रनमा महतोले पेभिलियन फर्काए। पहिलो र तेस्रो बलमा विकेट लिएपछि महतोले अन्तिम बलमा स्टक कुगेलेइनलाई ७ रनमा बोल्ड गर्दा सुदूरपश्चिममाथि जनकपुर हाबी भएको थियो। २०औं ओभरमा पहिलो बलमा नरेन साउदलाई किशोरले ३ रनमा क्याच गराए।
बलिङमा जनकपुरका किशोर महतोले चार विकेट लिए। उनले चार ओभरमा ३५ रन दिए। शेर मल्ल र अरनिको यादवले २-२ विकेट लिए भने हर्ष थाकरले १ विकेट हात पारे।
