भारतीय ब्याटर रिंकु सिंह पारिवारिक कारणले गर्दा घर फर्किएका छन्।
यसले गर्दा आइसिसी टी-२० विश्वकपअन्तर्गत सुपर-८ को खेलमा बिहीबार चेन्नईमा जिम्बाब्वेविरुद्ध उनी खेल्ने सम्भावना कम देखिएको छ।
मंगलबार साँझ चेन्नईको एमए चिदम्बरम स्टेडियममा भएको अभ्यास सत्रमा टोलीका अन्य सदस्यहरू उपस्थित भए पनि रिंकु देखिएनन्। केही भारतीय मिडियाले उनको बुबा बिरामी भएर अस्पताल भर्ना भएको उल्लेख गरेका छन्।
जारी प्रतियोगितामा रिंकुको प्रदर्शन अहिलेसम्म बिर्सनलायक रहेको छ। समूह चरणका खेलहरूमा ६, १, ११ र ६ रन मात्र बनाएका उनी, दक्षिण अफ्रिकाविरुद्ध अहमदाबादमा भएको खेलमा शून्य रनमै आउट भएका थिए। उक्त खेलमा भारत ७६ रनले पराजित भएको थियो।
यदि रिंकुले जिम्बाब्वेविरुद्ध खेल्न नसकेमा भारतसँग सन्जु सामसन र अक्षर पटेल विकल्पका रूपमा छन्।
यदि सामसनलाई टोलीमा ल्याए ब्याटिङ क्रममा हेरफेर गर्नुपर्ने हुन्छ। तर अक्षर पटेललाई ल्याएमा उनी ८औँ नम्बरमै ब्याटिङ गर्न सक्छन्, जहाँ रिंकुले दक्षिण अफ्रिकाविरुद्ध ब्याटिङ गरेका थिए।
जिम्बाब्वेसँगको खेलपछि भारतले मार्च १ मा कोलकातामा वेस्ट इन्डिजसँग आफ्नो अन्तिम 'सुपर एट' खेल खेल्नेछ। यदि भारत सेमिफाइनलमा पुग्यो भने उक्त खेल मार्च ५ मा मुम्बईमा हुनेछ। तर, यदि सेमिफाइनलमा पाकिस्तानसँग प्रतिस्पर्धा हुने भयो भने उक्त खेल मार्च ४ मा कोलम्बोमा खेलिनेछ।
-1746009348.jpg)
