टी-२० विश्वकप २०२६ मा इंग्ल्याण्डले पाकिस्तानलाई २ विकेटले पराजित गर्दै सेमिफाइनलमा आफ्नो स्थान सुरक्षित गरेको छ।
इंग्ल्याण्डको यो जितको मुख्य नायक कप्तान ह्यारी ब्रुक बने, जसले कप्तानी इनिङ्स खेल्दै सानदार शतक प्रहार गरे।
पहिले ब्याटिङ गरेको पाकिस्तान १६४/९ बनाउँदा इंग्ल्याण्डले १६६/८ (१९.४ ओभर) अवस्थामा लक्ष्य पार गर्यो।
इंग्ल्याण्डका कप्तान ह्यारी ब्रुकले यस खेलमा आफूलाई ब्याटिङ अर्डरमा माथि (नम्बर ३ मा) बढुवा गरे। उनी ब्याटिङ गर्न आउँदा टोलीको अवस्था नाजुक थियो। शाहीन शाह अफ्रिदीले पहिलो बलमै विकेट लिएका थिए।
ब्रुकले मात्र ५० बलमा आफ्नो पहिलो टी-२० अन्तर्राष्ट्रिय शतक पूरा गरे। उनले अफ्रिदीलाई छक्का र चौका प्रहार गर्दै शतक पुरा गरेका थिए। शतक बनाए लगत्तै उनी आउट भए पनि उनले इंग्ल्याण्डलाई जितको नजिक पुर्याइसकेका थिए।
ब्रुक आउट भएपछि इंग्ल्याण्डलाई जित्न १० रन मात्र बाँकी थियो। तर, अन्तिम तिर इंग्ल्याण्डले लगातार विकेट गुमाउँदा खेल केही तनावपूर्ण बन्यो। अन्ततः जोफ्रा आर्चरले चौका प्रहार गर्दै इंग्ल्याण्डलाई जित दिलाए। यो जितसँगै इंग्ल्याण्ड लगातार पाँचौँ पटक टी-२० विश्वकपको सेमिफाइनलमा पुग्न सफल भएको छ।
पहिले ब्याटिङ गरेको पाकिस्तानका लागि साहिबजादा फरहानले उत्कृष्ट ६३ रन बनाए। उनी यस विश्वकपमा पाकिस्तानका लागि अर्धशतक बनाउने एक्लो खेलाडी हुन्।
पाकिस्तानको मध्यक्रमका ब्याटरहरू इंग्ल्याण्डका स्पिनर लियाम डसनको अगाडि टिक्न सकेनन्। डसनले ३ विकेट लिए। पाकिस्तानले मध्यम स्कोर मात्र बनाउन सक्यो, जुन अन्ततः हारको कारण बन्यो।
खेलपछि ब्रुकले आफू तेस्रो नम्बरमा ब्याटिङ गर्न जानुको श्रेय प्रशिक्षक ब्रेन्डन म्याकुलमलाई दिए। म्याकुलमले नै ब्रुकलाई आज माथिल्लो क्रममा गएर खेल्न सल्लाह दिएका थिए, जुन निर्णय सही सावित भयो।
इंग्ल्याण्ड सेमिफाइनल पुग्दा अब न्युजिल्यान्डलाई हराएमा आफ्नो समूहमा शीर्ष स्थानमा रहनेछ। पाकिस्तानको अवस्था भने कठिन छ। अब उसले श्रीलंकालाई हराउनुपर्नेछ र अरू खेलको नतिजामा पनि भर पर्नुपर्नेछ।
-1746009348.jpg)
