आइसिसी टी-२० विश्वकप २०२६ को उपाधि भिडन्त घरेलु टोली भारत र न्युजिल्यान्डबीच हुने भएको छ।
बिहीबार भएको दोस्रो सेमिफाइनलमा घरेलु टोली भारतले इंग्ल्यान्डलाई ७ रनले पराजित गर्दै आगामी आइतबार अहमदावादमा न्युजिल्यान्डसँगको भेट पक्का गरेको हो। भारत विश्वकपको साविक विजेता हो। अघिल्लो संस्करणमा भारतले दक्षिण अफ्रिकालाई हराएर उपाधि जितेको थियो।
बिहीबार भएको दोस्रो सेमिफाइनल खेल हाइ स्कोरिङ भयो। भारतले दिएको २५४ रनको लक्ष्य पछ्याएको इंग्ल्यान्डले ७ विकेटको क्षतिमा २४६ रन जोडेको थियो।
इंग्ल्यान्डका लागि ज्याकब बेथेलले शतक प्रहार गरे पनि जितका लागि पर्याप्त हुन सकेन। अन्तिम ओभरमा रनआउट भएका उनले १०५ रन बनाउने क्रममा ४८ बलमा ८ चौका र ७ छक्का प्रहार गरेका थिए। तर अरु ब्याटर चल्न सकेनन्।
लगातार विकेट जाँदा बेथेलको शतक निरर्थक भयो। अन्तिम ओभरमा ३० रन चाहिँदा इंग्ल्यान्डले २२ रन प्रहार गरेको थियो। जसमा जोफ्रा आर्चरले शिभम दुवेलाई तीन छक्का प्रहार गरेका थिए।
मुम्बईको वानेखेडे रंगशालामा टस जितेको इंग्ल्यान्डले फिल्डिङ रोजेपछि पहिले ब्याटिङ गरेको भारतले ७ विकेटको क्षतिमा २५३ रनको विशाल योगफल खडा गर्यो।
भारतका लागि ओपनिङ ब्याटर सन्ज सामसनले ८९ रनको महत्वपूर्ण इनिङख खेले। उनले ४२ बलमा ८ कचौका र ७ छक्का प्रहार गरेका थिए।
अभिषेक शर्मा ९ रनमा आउट हुँदा इशान किशनले १८ बलमा ४ चौका र २ छक्काको मद्दतमा ३९ रन बनाए। शिवम दुबेले ४३ रन (२५ बल) बनाउने क्रममा १ चौका र ४ छक्का प्रहार गरे।
कप्तान सूर्यकुमार यादव ११ रन रनमा आउट हुँदा हार्दिक पाण्ड्याले १२ बलमा ३ चौका र २ छक्का प्रहार गर्दै २७ रन जोडे। तिलक बर्माले ७ बलमा ३ छक्का प्रहार गर्दै २१ रन बनाए।
सन्जु सामसन र इशान किशनबीच दोस्रो विकेटका लागि ९७ रन (४५ बल) साझेदारी हुँदा भारतको रनले गति लिएको थियो।
बलिङमा इंग्ल्यान्डका विल ज्याक्स र आदिल राशिदले २-२ विकेट लिए। जोफ्रा आर्चरले १ विकेट लिए पनि महँगो सावित भए। उनले ४ ओभरमा ६१ रन खर्चिएका थिए।
