आइतबार भएको आईसीसी पुरुष टी-२० विश्वकप २०२६ को फाइनलमा न्युजिल्यान्डलाई ९६ रनले पराजित गर्दै भारतले इतिहास रचेको छ। यो भारतको तेस्रो टी-२० विश्वकप उपाधि हो।
भारत र श्रीलंकामा भएको एक महिना लामो यस प्रतियोगितामा धेरै उत्कृष्ट व्यक्तिगत र टोलीले प्रदर्शन गरे। यस प्रतियोगितामा बनेका प्रमुख कीर्तिमानहरू यस प्रकार छन्:
• तेस्रो उपाधि: न्युजिल्यान्डलाई हराएसँगै भारत तीन पटक टी-२० विश्वकप जित्ने विश्वकै पहिलो टोली बनेको छ। यसअघि भारतले २००७ र २०२४ मा उपाधि जितेको थियो। भारत लगातार दुई पटक उपाधि जित्ने र आफ्नै देशमा विश्वकप जित्ने पहिलो टोली पनि बनेको छ।
• उच्चतम स्कोर (२५५/५) : फाइनलमा भारतले बनाएको २५५/५ रनको स्कोर टी-२० विश्वकपको फाइनल र कुनै पनि नकआउट खेलकै इतिहासमा सबैभन्दा उच्च स्कोर हो।
• लगातार २५०+ स्कोर: भारत लगातार दुई खेलमा २५० भन्दा बढी रन बनाउने पहिलो टोली बन्यो। भारतले सेमिफाइनलमा इंग्ल्याण्ड विरुद्ध २५३/७ रन बनाएको थियो। यस प्रतियोगितामा भारतले तीन पटक २५० को आँकडा पार गर्यो, जसमा जिम्बावे विरुद्ध बनाएको २५६/४ रन यस संस्करणकै उच्च स्कोर थियो।
• सर्वाधिक रन (३८३): पाकिस्तानका साहिबजादा फरहानले एकै विश्वकपमा ३८३ रन बनाउँदै नयाँ कीर्तिमान कायम गरे। यसअघि २०१४ मा विराट कोहलीले बनाएको ३१९ रनको रेकर्ड उनले तोडेका हुन्। यसैगरी टिम साइफर्ट (३२६) र सन्जु सामसन (३२१) ले पनि कोहलीको रेकर्ड उछिनेका छन्।
• उच्चतम साझेदारी (१७६): पाकिस्तानका साहिबजादा फरहान र फखर जमानले श्रीलंका विरुद्ध १७६ रनको ओपनिङ साझेदारी गरे। यो टी-२० आइमा कुनै पनि विकेटका लागि भएको अहिलेसम्मकै उच्च साझेदारी हो।
• पावरप्लेमा कीर्तिमान (९२): भारतले सुरुवाती ६ ओभरमा विना विकेट ९२ रन बनायो। यो टी-२० विश्वकपको पावरप्लेमा बनेको संयुक्त उच्च स्कोर हो, जसले दुई वर्षअघि वेस्ट इन्डिजले अफगानिस्तान विरुद्ध बनाएको रेकर्डको बराबरी गरेको छ।
• फाइनलमा व्यक्तिगत उच्च स्कोर (८९): सन्जु सामसनले फाइनल खेलमा ८९ रन बनाए, जुन टी-२० विश्वकपको फाइनलमा कुनै पनि ब्याटरले बनाएको सबैभन्दा उच्च व्यक्तिगत स्कोर हो।
• उच्चतम म्याच एग्रिगेट (४९९): भारत र इंग्ल्याण्ड बीचको सेमिफाइनलमा दुवै टोलीले गरी कुल ४९९ रन बनाए। यो टी-२० विश्वकप इतिहासकै सबैभन्दा बढी रन बनेको खेल हो। भारतले २५३/७ बनाउँदा इंग्ल्याण्ड २४६/७ मा समेटिएको थियो।
• सबैभन्दा छिटो अर्धशतक (१८ बल): अभिषेक शर्माले फाइनलमा मात्र १८ बलमा अर्धशतक पूरा गरे। यो यस संस्करणको र टी-२० विश्वकपको नकआउट खेलकै सबैभन्दा छिटो अर्धशतक हो।
• सर्वाधिक छक्का (२४): सन्जु सामसनले यस प्रतियोगिताभर कुल २४ छक्का प्रहार गरे, जुन एकै विश्वकपमा कुनै पनि खेलाडीले प्रहार गरेको सर्वाधिक छक्का हो।
• सबैभन्दा छिटो शतक (३३ बल): न्युजिल्यान्डका फिन एलेनले मात्र ३३ बलमा शतक प्रहार गर्दै विश्वकीर्तिमान बनाए। यसअघि २०१६ मा क्रिस गेलले ४७ बलमा शतक बनाएका थिए।
• टोलीद्वारा सर्वाधिक छक्का (१०६): भारतले यस विश्वकपमा जम्मा १०६ छक्का प्रहार गर्यो। कुनै पनि टि-२० प्रतियोगितामा १०० भन्दा बढी छक्का प्रहार गर्ने भारत पहिलो टोली हो।
• उच्चतम औसत (१४६.००): जिम्बावेका ब्रायन बेनेटले ६ इनिङ्समध्ये ४ पटक नटआउट रहँदै २९२ रन बनाए। उनको औसत १४६.०० रह्यो, जुन टि-२० विश्वकप इतिहासकै उच्च औसत हो।
-1746009348.jpg)
