जिम्बावेका तीव्र गतिका बलर ब्लेसिङ मुजरबानीले इन्डियन प्रिमियर लिग (आइपिएल) को टोली कोलकाता नाइट राइडर्स (केकेआर) सँग सम्झौता गरेपछि सन् २०२६ को पाकिस्तान सुपर लिग (पिएसएल) बाट आफ्नो नाम फिर्ता लिएका छन्।
मुजरबानीले आफू पिएसएलमा सहभागी नहुने जानकारी आफ्नो टोली 'इस्लामावाद युनाइटेड' लाई गराइसकेका छन् भने केकेआरले पनि शुक्रबार उनलाई अनुबन्ध गरेको कुरा पुष्टि गरेको छ।
कोलकाताले बंगलादेशका बलर मुस्ताफिजुर रहमानलाई रिलिज गरेपछि उनको ठाउँमा मुजरबानीलाई टोलीमा भित्र्याएको हो।
मुस्ताफिजुरलाई भने पिएसएलको टोली लाहोर कलन्दर्सले अनुबन्ध गरिसकेको छ। पिएसएल मार्च २६ बाट सुरु हुँदैछ भने आइपिएल त्यसको दुई दिनपछि सुरु हुनेछ।
यसअघि मुल्तान सुल्तान्सबाट पिएसएलको उपाधि जितिसकेका मुजरबानी यसपालिको अक्सनमा भने बिकेका थिएनन्। पछि इस्लामावाद युनाइटेडले वेष्ट इन्डिजका बलर समर जोसेफलाई छोडेर मुजरबानीलाई सिधै अनुबन्ध गरेको थियो।
आइपिएल र पिएसएल एकै समयमा सञ्चालन हुन लागेको यो दोस्रो वर्ष हो।
यसअघि पनि दक्षिण अफ्रिकाका कोर्बिन बोसले पिएसएल छोडेर आईपिएल रोजेपछि उनलाई पिएसएलले एक सिजनको प्रतिबन्ध लगाएको थियो। मुजरबानीलाई पनि त्यस्तै कारबाही हुन्छ वा हुँदैन भन्नेबारे पिएसएलले अहिले नै केही खुलाएको छैन।
मुजरबानीले हालैको टी-२० विश्वकपमा निकै उत्कृष्ट प्रदर्शन गरेका थिए। जिम्बावेलाई सुपर-८ सम्म पुर्याउन महत्वपूर्ण भूमिका खेलेका उनले ६ खेलमा १३ विकेट लिएका थिए।
उनले अष्ट्रेलिया विरुद्धको खेलमा मात्रै ४ विकेट लिएर टोलीलाई ऐतिहासिक जित दिलाउन मद्दत गरेका थिए।
-1746009348.jpg)
