प्रधानमन्त्री कप एकदिवसीय राष्ट्रिय क्रिकेट प्रतियोगिताको उपाधिका लागि त्रिभुवन आर्मी क्लब र सुदूरपश्चिम प्रदेश भिड्ने भएका छन्। दुई टोलीबीच शुक्रबार उपाधि भिडन्त हुनेछ।
आर्मीले सोमबार कोशीलाई हराएर शीर्ष स्थान पक्का गर्दा मधेश प्रदेश पराजित भएपछि सुदूरपश्चिम दोस्रो स्थानमा रहने भएको हो।
सोमबार वीरगञ्जमा घरेलु टोली मधेशलाई सशस्त्र प्रहरी बलको एपिएफ क्लबले ७४ रनले हरायो। जितसँगै ११ अंक जोडेर तेस्रो स्थानमा पुगेको एपिएफले शीर्ष ६ मा स्थान रहेर जय ट्रफी खेल्ने पक्का जस्तै भएको छ।
एपिएफले दिएको ३९१ रनको विशाल लक्ष्य पछ्याएको मधेशले ८ विकेटको क्षतिमा ३१६ रन बनायो।
उसका लागि अरनिको यादवले ७३ बलमा ८६ रन र आदिल अन्सारीले ४३ बलमा ८७ रन जोडे पनि पर्याप्त हुन सकेन।
किनभने टस हारेर पहिले ब्याटिङ गरेको एपिएफले ओपनिङ ब्याटर आसिफ शेखको दोहोरो शतकको मद्दतमा किर्तिमानी ३९० रन बनाएको थियो।
प्रधानमन्त्री कपमा आसिफ दोहोरो शतक प्रहार गर्ने पहिलो ब्याटर बने। उनले २०८ रन बनाए। रिटायर्ड हट भएका आसिफले १४२ बल खेलेर १५ चौका र १७ छक्का प्रहार गरे।
उनी प्रधानमन्त्री कपमा दोहोरो शतक, एकै खेलमा सर्वाधिक रन, सर्वाधिक छक्कासहितका कीर्तिमान आफ्नो नाममा लेखाउन सफल भए।
खेलमा आसिफसँगै कप्तान रोहित पौडेल र सन्दीप जोराले अर्धशतक प्रहार गरेपछि एपिएफले प्रधानमन्त्री कपकै सर्वाधिक योगफल ३९० तयार गरेको हो। रोहितले ५५ रन र जोराले ५६ रन बनाए।
एपिएफले यसै संस्करणमा आफूविरूद्ध नेपाल पुलिस क्लबले बनाएको कीर्तिमान तोडेको हो। यसअघि पुलिसले एपिएफविरूद्ध ९ विकेटको क्षतिमा ३५५ रन बनाएको थियो। पुलिसले भने आठ वर्ष पुरानो कीर्तिमान तोडेको थियो। सन् २०१८ मा एपिएफले मधेशविरूद्ध ३३९ रन बनाएर कीर्तिमान बनाएको थियो।
यो संस्करणमा पुलिसले एपिएफको कीर्तिमान तोडे पनि २० दिनमै एपिएफले आफ्नो नाममा रेकर्ड ल्याउन सफल भएको हो।
