चेन्नई सुपर किंग्सले सन् २०२४ अप्रिलपछि पहिलो पटक लगातार दुई खेल जितेको छ। सञ्जु सामसनले फेरि पनि चेन्नईका लागि सर्वाधिक रन बनाए भने नुर अहमदले २१ रन दिएर ३ विकेट लिँदै लयमा फर्किएको संकेत दिए।
यो जितसँगै चेन्नई अंक तालिकाको पुछारबाट माथि उक्लिएको छ र ४ अंक भएका अन्य टोलीहरूको समूहमा सामेल भएको छ। ठिक दुई वर्षपछि चेन्नईले लगातार दुई खेल जित्न सफल भएको हो।
टस हारेर शीत परेको मैदानमा बलिङ गर्नुपरे पनि चेन्नईले चेपौक रंगशालामा कोलकातालाई स्तब्ध पार्यो। कोलकाता यो सिजन अहिलेसम्म जितविहीन छ।
सञ्जु सामसन, डेवाल्ड ब्रेभिस र युवा खेलाडी आयुष म्हात्रेको पारीको मद्दतले चेन्नईले १९२ रनको चुनौतीपूर्ण योगफल खडा गर्यो। सुरुवातमै कप्तान रुतुराज गायकवाड आउट भए पनि त्यो चेन्नईका लागि फाइदाजनक बन्यो।
म्हात्रे र सामसनले पावरप्लेको भरपूर फाइदा उठाए। म्हात्रेले मात्र १६ बलमा ३८ रनको आक्रामक पारी खेले। चेन्नईले पावरप्लेको ६ ओभरमा ७२ रन बनाएको थियो, जुन कोलकाताको (३६ रन) भन्दा दोब्बर थियो। यही अन्तर नै खेलको निर्णयक मोड बन्यो।
ब्याटिङमा जस्तै बलिङमा पनि चेन्नईका बलरहरू हाबी भए। अन्शुल कम्बोज र खलील अहमदले पावरप्लेमै फिन एलेन र सुनिल नरेन जस्ता ठूला विकेट लिएर कोलकातालाई दबाबमा राखे। बीचका ओभरहरूमा चेन्नईका स्पिनरहरूले ८ ओभरमा मात्र ४७ रन दिएर ४ विकेट झारेपछि कोलकाताको जितको बाटो बन्द भयो।
ढिलो ओभर रेटका कारण कोलकाताका कप्तान अजिंक्य रहाणेलाई १२ लाख भारु जरिवाना गरिएको छ। यो सिजन कोलकाताको यो पहिलो गल्ती हो।
कोलकाताका लागि अजिंक्य रहाणे र अंगकृष रघुवंशीले सुस्त ब्याटिङ गर्दा रन रेटको दबाब बढ्दै गयो। नुर अहमदले घातक बलिङ गर्दै रहाणे, क्यामरुन ग्रिन र रिंकु सिंहलाई आउट गरे। क्यामरुन ग्रिन गोल्डेन डक (पहिलो बलमै आउट) भए। नुरले ४ ओभरमा मात्र २१ रन खर्चेर ३ विकेट लिए। अन्तिम ५ ओभरमा कोलकातालाई ८६ रन चाहिएको थियो, जुन असम्भव जस्तै थियो।
