रियल म्याड्रिडका स्टार मिडफिल्डर तथा इंग्ल्याण्डका चर्चित फुटबलर जुड बेलिङघमले क्रिकेटमा लगानी गरेका छन्। उनले 'द हन्ड्रेड' क्रिकेट प्रतियोगिता खेल्ने टोली 'बर्मिङ्घम फिनिक्स' को शेयर खरिद गरेका हुन्।
बेलिङघमले करिब १० लाख पाउण्ड (करिब १६ करोड ७० लाख नेपाली रुपैयाँ) लगानी गरेर यो क्रिकेट टोलीको १.२ प्रतिशत शेयर किनेका हुन्।
उनले यो शेयर बर्मिङ्घम सिटी फुटबल क्लबका मालिक 'नाइटहेड क्यापिटल' र वारविकशायर काउन्टी क्रिकेट क्लबबाट किनेका हुन्। यो लगानीपछि पनि टोलीको मुख्य स्वामित्व वारविकशायरसँगै रहनेछ।
बर्मिङ्घममै जन्मिएका र हुर्किएका २१ वर्षीय बेलिङघम सानैदेखि क्रिकेटका सौखिन हुन्। उनले किशोर अवस्थामा स्थानीय क्लबबाट क्रिकेट समेत खेलेका थिए।
उनले एक अन्तर्वार्तामा भनेका छन्, ‘म बर्मिङ्घम सहरलाई माया गर्छु र यो सहरले मेरो लागि जे गर्यो, त्यसप्रति म आभारी छु। मलाई क्रिकेट पनि मन पर्छ, त्यसैले यो अवसर आउँदा मैले दुई पटक नसोची लगानी गर्ने निर्णय गरेँ।’
बेलिङघमले आफ्नो यो लगानी सहरका बालबालिकाहरूलाई खेलकुदमा लाग्न प्रेरित गर्नका लागि भएको बताएका छन्। उनी चाहन्छन् कि बालबालिकाहरूले फुटबल मात्र नभई क्रिकेट जस्ता अन्य खेलमा पनि अवसर र बाटोहरू छन् भन्ने कुरा बुझून्। क्लबले जनाए अनुसार बेलिङघमले अब बर्मिङ्घम क्षेत्रमा खेलकुद र सामाजिक कार्यहरूमा महत्त्वपूर्ण भूमिका खेल्नेछन्।
बेलिङघमले आफ्नो फुटबल करियर बर्मिङ्घम सिटीबाटै सुरु गरेका थिए। पछि उनी जर्मन क्लब बोरुसिया डर्टमण्ड पुगे र सन् २०२३ मा करिब ८८ मिलियन पाउण्डमा विश्वकै प्रतिष्ठित क्लब रियल म्याड्रिडमा आबद्ध भए।
