ओलम्पिक खेलकुद २०२८ का लागि अमेरिकाको क्यालिफोर्नियास्थित पोमोनामा क्रिकेट रंगशाला निर्माण कार्य सुरु भएको छ।
सन् २०२८ मा लस एन्जलसमा हुने ओलम्पिकका लागि यो एउटा ठूलो सुरुवात हो।
बुधबार 'फेयरप्लेक्स ग्राउण्ड' मा आयोजित विशेष समारोहमा आइसिसीका अध्यक्ष जय शाहले यसलाई विश्वका साढे २ अर्ब फ्यानका लागि एउटा ‘महत्त्वपूर्ण कोसेढुङ्ग’ भएको बताए।
क्रिकेट ओलम्पिकमा फर्किनु सामान्य कुरा होइन। यसअघि सन् १९०० मा भएको ओलम्पिकमा अन्तिम पटक क्रिकेट खेलिएको थियो, जहाँ बेलायत र फ्रान्सबीच दुई दिने खेल भएको थियो। अब ठिक १२८ वर्षपछि सन् २०२८ को जुलाई १४ देखि ३० सम्म हुने लस एन्जलस ओलम्पिकमा क्रिकेट पुनः देखिनेछ।
यो रंगशाला ओलम्पिकका लागि मात्र होइन, त्यसअघि नै प्रयोगमा आउनेछ। अमेरिकाको व्यावसायिक टि-२० लिग 'मेजर लिग क्रिकेट' अन्तर्गतको टोली 'लस एन्जलस नाइट राइडर्स' ले जुलाई १ देखि ५ सम्म यहाँ तीनवटा खेल खेल्नेछ। यो लिगमा हाल ६ वटा व्यावसायिक टोलीहरू आबद्ध छन्।
यसले क्रिकेटलाई यसको परम्परागत क्षेत्रभन्दा बाहिर (अमेरिका जस्ता देशमा) फैलाउन यसले ठुलो मद्दत गर्नेछ।
ओलम्पिकमा महिला र पुरुष दुवैतर्फ टी-२० खेल हुनेछन्। यसले गर्दा साना र ठुला टोलीहरूबीचको अन्तर घट्दै जाने विश्वास गरिएको छ।
