गत मंगलबार कीर्तिपुरमा नेपाल र युएईबीच भएको दोस्रो टी-२० आई खेलका क्रममा युएईका कप्तान मुहम्मद वासिमले खेल भावना विपरीत काम गरेको पाइएको छ।
उनले खेल सकिएपछि आयोजित पुरस्कार वितरण समारोहमा बोल्दै अम्पायरहरूले ‘पक्षपात’ गरेको आरोप लगाएका थिए।
अन्तर्राष्ट्रिय क्रिकेट परिषद (आइसिसी) को आचारसंहिता उल्लंघन गरेको भन्दै उनलाई दुईवटा कारबाही गरिएको छ।
उनले उक्त खेलबापत पाउने पारिश्रमिक (म्याच फि) को १५ प्रतिशत रकम जरिवाना स्वरूप काटिनेछ। उनको अनुशासनको रेकर्डमा एक 'डिमेरिट पोइन्ट' थपिएको छ। पछिल्लो दुई वर्षमा उनले यस्तो गल्ती गरेको यो पहिलो पटक हो।
आइसीसीको नियमअनुसार कुनै पनि खेलाडीले खेलको घटना, अम्पायर वा विपक्षी खेलाडीको बारेमा सार्वजनिक रूपमा नराम्रो टिप्पणी वा आलोचना गर्न पाउँदैनन्। वासिमले अम्पायरलाई 'पक्षपाती' भन्नु यही नियमको उल्लंघन हो।
वासिमले आफ्नो गल्ती स्वीकार गरिसकेका छन्। उनले आइसिसीका म्याच रेफ्री वेन्डेल ला ब्रुईले तोकेको सजायलाई चुपचाप स्वीकार गरेकाले यस विषयमा थप बहस वा सुनुवाइको आवश्यक नपरेको हो। नेपाली अम्पायरहरू बुद्धि प्रधान, विनय कुमार झा, दुर्गा सुवेदी र सञ्जय सिग्देलले उनीविरुद्ध उजुरी दिएका थिए।
यदि कुनै खेलाडीले २४ महिनाभित्र ४ वा सोभन्दा बढी डिमेरिट पोइन्ट पाएमा उसलाई निश्चित खेलहरू खेल्न नपाउने गरी प्रतिबन्ध (ब्यान) लगाइन्छ। अहिले वासिमले १ डिमेरिट पोइन्ट मात्र पाएका छन्, जुन २४ महिनापछि उनको रेकर्डबाट हट्नेछ।
