आइसिसी विश्वकप लिग-२ अन्तर्गत नेपाल, युएई र ओमानबीचको त्रिकोणात्मक एकदिवसीय सिरिजमा युएईले ओमानलाई २५ रनले पराजित गरेको छ।
सोमबार कीर्तिपुरस्थित त्रिवि मैदानमा भएको खेलमा टस जितेको ओमानले फिल्डिङ रोजेपछि पहिले ब्याटिङ गरेको युएईले ७ विकेटको क्षतिमा २६८ रन बनाएको थियो।
युएईका लागि अर्यंश शर्माले शतक प्रहार गरे। उनले १०५ रन बनाए। ओपनर शर्माले १२५ बलमा १० चौका र २ छक्का प्रहार गरेका थिए। शर्मा र अडिप उस्मानीबीच पहिलो विकेटका लागि ३०.२ ओभरमा १६३ रनको साझेदारी भएको थियो। उस्मानीले ६४ रन बनाए।
हरप्रित सिंहले पनि ५४ रनको योगदान गरे। शीर्ष तीन ब्याटरले अर्धशतक बनाए पनि युएईका अरु ब्याटर चल्न सकेनन्। युएईले पछिल्ला ७ विकेट १०३ रन बनाउँदा गुमाएको थियो।
बलिङमा ओमानका शाह फैसलले ३ विकेट लिए। उनले १० ओभरमा १ मेडन राख्दा ६२ रन बनाए।
२६९ रनको लक्ष्य पछ्याएको ओमान ४७.५ ओभरमा २४३ रनमा अलआउट भयो। ओमानका लागि ओपनर तथा कप्तान जतिन्दर सिंहले ४६ रन र विनायक शुक्लाले नटआउट ५८ रन बनाए।
बलिङमा युएईका अजय कुमारले ६ विकेट लिए। उनले ९.५ ओभरमा १ मेडन राख्दा ३५ रन खर्चिए।
जितसँगै लिग-२ अंक तालिकाको पुछारमा रहेको युएईले २२ खेलबाट १२ अंक जोडेको छ। सातौं अर्थात् पुछारबाट दोस्रो स्थानमा रहेको नेपालले २१ खेलबाट १४ अंक जोडेको छ। ओमान भने २५ खेलबाट २९ अंक जोड्दै तेस्रो स्थानमा रहेको छ।
