बंगलादेशी स्टार क्रिकेटर शाकिब अल हसनले गत फेब्रुअरी-मार्चमा भएको टी-२० विश्वकपमा बंगलादेश सहभागी नहुनुलाई तत्कालीन अन्तरिम सरकारको 'ब्लन्डर' भनी टिप्पणी गरेका छन्।
भारतसँगको बिग्रँदो राजनीतिक सम्बन्ध र सुरक्षाको कारण देखाउँदै सरकारले अनुमति नदिएपछि बंगलादेशको ठाउँमा स्कटल्याण्डले विश्वकप खेलेको थियो।
सन् १९९९ पछि पहिलो पटक बंगलादेशले विश्वकप गुमाएको सन्दर्भमा मुम्बईमा आयोजित एक कार्यक्रममा शाकिबले भने, ‘बंगलादेशी क्रिकेटका लागि यो ठूलो क्षति हो। हामी क्रिकेटलाई माया गर्ने देश हौं र फ्यानहरू आफ्ना खेलाडीलाई विश्वकपमा देख्न चाहन्थे। सरकारले नखेल्ने निर्णय गर्नु एउटा ठूलो भूल थियो।’
भारत र बंगलादेशबीचको राजनीतिक तनावका कारण भारतीय क्रिकेट बोर्डले बंगलादेशी बलर मुस्ताफिजुर रहमानलाई आईपीएलबाट हटाएको थियो। त्यसपछि बंगलादेश क्रिकेट बोर्डले आफ्ना खेलहरू श्रीलंकामा सार्न माग गरे पनि आईसीसीले त्यो मानेन। अन्ततः सरकारको निर्देशनमा बंगलादेश विश्वकपबाट बाहिरियो।
यद्यपि, शाकिब भारत र बंगलादेशबीचको क्रिकेट सम्बन्ध फेरि सुध्रिनेमा आशावादी छन्। अगस्ट वा सेप्टेम्बरमा हुन सक्ने दुई देशबीचको शृंखलाले चिसिएको सम्बन्धलाई पुनः न्यानो बनाउने उनले विश्वास व्यक्त गरे।
पुराना सहकर्मी तमिम इकबाल बंगलादेश क्रिकेट बोर्डको नयाँ अध्यक्ष बनेकोमा शाकिबले खुसी व्यक्त गरेका छन्। विगतमा यी दुई खेलाडीबीच मनमुटाव भए पनि शाकिबले भने, ‘तमिम अध्यक्ष हुनु बंगलादेशी क्रिकेटका लागि फाइदाजनक हुनेछ। उनीसँग क्रिकेट विकासका लागि दीर्घकालीन योजना हुनेछ भन्ने मलाई विश्वास छ।’
सन् २०२४ अगस्टमा शेख हसिनाको सरकार ढलेपछि अवामी लिगबाट सांसद रहेका शाकिब बंगलादेश फर्केका छैनन्। उनी हाल अमेरिकामा बस्छन् र उनीविरुद्ध बंगलादेशमा धेरै मुद्दाहरू दर्ता छन्।
तर, सन् २०२६ फेब्रुअरीमा बनेको नयाँ सरकारले शाकिब र अर्का पूर्व कप्तान मशरफ मोर्तजाविरुद्धका मुद्दाहरू चाँडो टुङ्ग्याएर उनीहरूलाई क्रिकेटमा फर्काउन पहल गर्ने बताएको छ। शाकिबले सन्यास लिनुअघि बंगलादेशमै गएर टेस्ट, ओडिआई र टी-२० तीनवटै फर्म्याटको पूर्ण शृंखला खेल्ने आफ्नो अन्तिम इच्छा रहेको बताएका छन्। उनले भने, ‘मलाई आशा छ, मैले चाहेजस्तै बिदाइ पाउनेछु र छिट्टै परिस्थिति राम्रो हुनेछ।’
