राजस्थान रोयल्सका कप्तान रियान परागलाई खेलको नियम उल्लंघन गरेको आरोपमा जरिवाना गरिएको छ।
मंगलबार पञ्जाब किंग्सविरुद्धको खेलका क्रममा ड्रेसिङ रुमभित्र 'भेप' (विद्युतीय चुरोट) प्रयोग गरेको पाइएपछि उनलाई म्याच फीको २५ प्रतिशत जरिवाना गरिएको हो।
पञ्जाबले दिएको २२३ रनको ठूलो लक्ष्य पछ्याइरहेको बेला रियान पराग ड्रेसिङ रुममा भेप तान्दै गरेको अवस्थामा देखिएका थिए।
सामाजिक सञ्जालमा उनको फोटो भाइरल भएपछि यो कुरा बाहिर आएको हो। भारतीय क्रिकेट बोर्डले यसलाई खेलको प्रतिष्ठामा आँच पुर्याउने कार्य मानेको छ।
म्याच रेफ्री अमित शर्माले सुनाएको कारबाहीलाई परागले स्वीकार गरेका छन्। उनलाई जरिवानाका साथै 'एक डिमेरिट प्वाइन्ट' पनि दिइएको छ।
बीसीसीआईले यो घटनालाई सामान्य रूपमा लिएको छैन।
बोर्डले एक विज्ञप्ति जारी गर्दै भनेको छ, ‘हामी आईपीएलको प्रतिष्ठा बचाउनका लागि सम्बन्धित टोली, यसका पदाधिकारी र खेलाडीमाथि थप कडा कारबाही गर्ने विकल्पबारे सोचिरहेका छौँ।’
दुई हप्ताभित्र राजस्थान रोयल्सको टिमबाट भएको यो दोस्रो गल्ती हो।
यसअघि अप्रिल १० मा रोयल च्यालेन्जर्स बेंगलुरुविरुद्धको खेलमा टोलीका म्यानेजर रोमी भिन्डरलाई डगआउटमा मोबाइल फोन चलाएको भन्दै १ लाख रुपैयाँ जरिवाना गरिएको थियो। म्यानेजर भिन्डरले पनि उक्त गल्ती भूलवश भएको भन्दै माफी मागेका थिए।
यसरी पटक-पटक नियम उल्लंघन भएपछि अहिले राजस्थान रोयल्सको टिम र व्यवस्थापनमाथि प्रश्न उठ्न थालेको छ।
