श्रीलंकाको यू-१९ पुरुष क्रिकेट टोलीका दुई सदस्यलाई गम्भीर नैतिक अपराधको आरोपमा प्रहरीले पक्राउ गरेको छ।
उनीहरूमाथि कोलम्बोको नाराहेनपिटास्थित आफू बसेको होटलमा महिलाहरू नुहाउँदै गरेको भिडियो खिचेको आरोप लागेको छ।
होटलमा बसिरहेका महिलाहरूले बाथरुममा मोबाइल फोन प्रयोग गरेर कसैले भिडियो खिचिरहेको थाहा पाएपछि प्रहरीमा उजुरी दिएका थिए। सोही उजुरीका आधारमा प्रहरीले ती दुई क्रिकेटरलाई नियन्त्रणमा लिएको हो।
नाराहेनपिटा प्रहरीले अहिले ती भिडियोहरू सामाजिक सञ्जाल वा अन्य कतै सेयर गरिएका छन् कि छैनन् भन्नेबारे गम्भीरतापूर्वक अनुसन्धान गरिरहेको छ।
पक्राउ परेका दुवै खेलाडीलाई 'अलुथकाडे मजिस्ट्रेट अदालत' मा पेश गरिएको थियो। अदालतले उनीहरूलाई जनही ५ लाख श्रीलंकाली रुपैयाँको व्यक्तिगत धरौटीमा रिहा गर्न आदेश दिएको छ। उनीहरूलाई आगामी मे २५ पुनः अदालतमा उपस्थित हुन भनिएको छ।
श्रीलंका क्रिकेट बोर्डले हालसम्म ती खेलाडीहरूमाथि कुनै पनि विभागीय कारबाहीको घोषणा गरेको छैन। बोर्डमा अहिले आन्तरिक पुनर्संरचना र पदाधिकारी परिवर्तनको काम भइरहेकाले यो विषयमा निर्णय हुन बाँकी रहेको बताइएको छ।
यो घटनाले श्रीलंकाको क्रिकेट वृत्तमा ठूलो धक्का पुर्याएको छ र युवा खेलाडीहरूको अनुशासनमाथि प्रश्न उठाएको छ।
