यसपटकको आइपिएलमा टोलीहरूले जसरी सजिलै २०० वा सोभन्दा बढी रन बनाइरहेका छन् र त्यसलाई पछ्याइरहेका छन्, त्यो साँच्चै अचम्मलाग्दो छ।
आइपिएल २०२६ को एउटा मुख्य विशेषता भनेको २०० प्लसको स्कोर सामान्य बन्नु हो। यो सिजनको पहिलो ४८ खेलमध्ये ३९ पटक टोलीहरूले २०० रनको आँकडा पार गरिसकेका छन्। गत वर्ष यही समयसम्म २७ पटक मात्र यस्तो स्कोर बनेको थियो। तर, रन बन्नु भन्दा पनि ठूलो कुरा, ती ठूला लक्ष्यहरू जसरी सजिलै पूरा भइरहेका छन्, त्यसले सबैलाई चकित पारेको छ।
तथ्यांक हेर्ने हो भने यो सिजन २०० वा सोभन्दा बढीको लक्ष्य पछ्याउने टोलीहरूले १२ खेल जितेका छन् भने ११ खेल मात्र हारेका छन्। गत वर्ष यही समयमा यो रेकर्ड ४ जित र १३ हारको थियो।
अचम्म त के छ भने, २२० भन्दा माथिको स्कोर पनि अहिले सुरक्षित छैन। २२० माथिको लक्ष्य पछ्याउँदा यो सिजन टोलीहरूले ८ पटक जित हात पारेका छन् भने ५ पटक मात्र हारेका छन्। गत वर्ष १५ यस्ता खेलमा लक्ष्य पछ्याउने टोलीले जम्मा २ पटक मात्र जितेका थिए।
यो सिजन रनको बाढी आउनुमा 'पावरप्ले' को ठूलो हात छ। २०० प्लसको लक्ष्य पछ्याउँदा सुरुवाती ६ ओभरमा औसत रन रेट ११.७८ छ, जुन गत वर्ष १०.४८ थियो।
जित हासिल भएका खेलहरूमा त पावरप्लेको रन रेट झनै बढेर १३.८१ पुगेको छ। यसको अर्थ, टोलीहरूले सुरुको ६ ओभरमै कुल लक्ष्यको ३७ प्रतिशतभन्दा बढी रन बनाइसक्छन्।
उदाहरणका लागि, राजस्थान रोयल्सले आरसीबी विरुद्ध २०२ रनको लक्ष्य पछ्याउँदा पावरप्लेमै ९७ रन जोडेको थियो। जसमा युवा खेलाडी वैभव सूर्यवंशीले मात्र २६ बलमा ७८ रन बनाएका थिए। त्यस्तै, पञ्जाब किंग्सले दिल्ली क्यापिटल्स विरुद्ध २६५ रनको विशाल लक्ष्य पनि सफलतापूर्वक पछ्याएर इतिहास रच्यो।
तथ्यांकअनुसार, जित्ने टोलीले १० ओभर सकिँदासम्म कुल लक्ष्यको कम्तिमा ५० प्रतिशत रन बनाइसकेका हुन्छन्। धेरैजसो खेलमा १० ओभरपछि प्रति ओभर चाहिने रन (रिक्वायर्ड रन रेट) १० वा ११ भन्दा तल झरिसकेको हुन्छ। यही कारणले गर्दा ठूला लक्ष्यहरू पनि सजिलै पूरा भइरहेका छन्।
आरसीबीले सिजनको पहिलो खेलमै सनराइजर्स हैदराबादको २०२ रनको लक्ष्य मात्र १५.४ ओभरमा पूरा गरेर यो सिजनको लय कस्तो हुनेछ भन्ने संकेत दिएको थियो।
हुन त सबै खेलमा लक्ष्य पछ्याउने टोली नै सफल भएका छैनन्। चेन्नईले मुम्बईलाई १०३ रनले र मुम्बईले गुजरातलाई ९९ रनले हराएका उदाहरण पनि छन्।
तर, समग्रमा हेर्दा पहिले असम्भव मानिने २२०-२३० सम्मका लक्ष्यहरू अहिले सामान्य बन्न थालेका छन्। 'इम्प्याक्ट प्लेयर' को नियमले ब्याटिङमा गहिराइ त थपेको छ नै, तर त्योभन्दा बढी ब्याटरहरूको सोच र खेल्ने शैलीमा आएको आक्रामक परिवर्तनले आइपिएल २०२६ मा ब्याटिङको नयाँ मापदण्ड स्थापित गरिदिएको छ।
