नेपालविरुद्धको एसियन गेम्सको खेलमा अम्पायरको निर्णयप्रति असन्तुष्टि जनाएका अफगानिस्तानका मोहम्मद इशाकलाई अन्तर्राष्ट्रिय क्रिकेट परिषद् (आईसीसी) ले कारबाही गरेको छ।
इशाकलाई आईसीसीको आचारसंहिताको लेभल–१ उल्लंघन गरेको भन्दै औपचारिक चेतावनी दिइएको छ भने उनको अनुशासनात्मक रेकर्डमा एक डिमेरिट अंक थपिएको छ।
नेपालविरुद्धको खेलमा अफगानिस्तानको इनिङ्सको १५औँ ओभरमा इशाक एलबिडब्लू आउट भएका थिए।
आउट भएपछि उनले हातले इशारा गर्दै आफ्नो करङतर्फ देखाएर अम्पायरको निर्णयप्रति असन्तुष्टि जनाएका थिए।
उनले आफ्नो गल्ती स्वीकार गरेपछि औपचारिक सुनुवाइ आवश्यक परेन। यो उनको पछिल्लो २४ महिनामा पहिलो गल्ती हो।
आईसीसीको आचारसंहिताअनुसार लेभल–१ को उल्लंघनमा औपचारिक चेतावनीदेखि खेल शुल्कको ५० प्रतिशतसम्म जरिवाना तथा एक वा दुई डिमेरिट अंकसम्मको कारबाही हुन सक्छ।
