इंग्लिस प्रिमियर लिग अप्रिल ३० सम्मका लागि स्थगित गरिएको छ। कोरोना भाइरस संक्रमण खतराका कारण लिग डेढ महिना पर सारिएको हो।
यसअघि फुटबल एसोसिएसनले अप्रिल पहिलो सातासम्मका लागि प्रिमियर लिगसहित सबै फुटबल प्रतियोगिता स्थगित गरेको थियो।
तर ब्रिटेनमा कोरोना संक्रमण बढिरहेकाले लिगसहित सबै प्रतियोगिता थप समयका लागि स्थगित गरिएको हो।
ब्रिटेनमा अहिलेसम्म २५ सयभन्दा बढीमा कोरोना संक्रमण भएको पुष्टि भएको छ।
अब मे महिनाबाट लिग गरिएको अवस्थामा जुनसम्ममा लिग सकिने फुटबल एसोसिएसनको तयारी छ।
२९औं चरणको खेल जारी रहँदा लिगका खेलका प्रभावित भएका हुन्।
लिगमा शीर्ष स्थानको लिभरपुलको २९ खेलबाट ८२ अंक छ। दोस्रो स्थानको म्यानचेस्टर सिटीभन्दा २५ अंकले अघि रहेको लिभरपुल ३० वर्षपछि पहिलो पटक लिग जित्ने संघारमा छ। तर कोरोनाले लिग नै रद्द भएको अवस्थामा लिभरपुलले उपाधि जित्छ वा जित्दैन भन्नेमा प्रश्न उठेको छ।
अप्रिल ३० पछि लिगका खेल नियमित रुपमा भएमा लिभरपुललाई उपाधि जित्न कुनै बाधा हुने छैन। किनकी अर्को सिजन प्रभावित नहुने अवस्थामा लिग सुचारु भए लिभरपुलले ९ खेलबाट ६ अंक जोडे उपाधि जित्नेछ।
प्रिमियर लिगको नियममा लिग रद्द नै भए के उपाधि के हुने भन्ने विषयमा स्पष्ट छैन। यद्यपी लिगको विषयमा निर्णय गर्ने अधिकार प्रिमियर लिगको बैठकमा छ।
बैठकमा दुई तिहाई मतको आधारमा निर्णय हुनेछ। यसको अर्थ २० मध्ये १४ क्लबले गर्ने निर्णय नै अन्तिम हुनेछ। लिग रद्द भएको अवस्थामा अंक तालिकाको शीर्ष स्थानमा रहेको लिभरपुलले उपाधि जित्नका लागि कम्तिमा १४ क्लबले उसको समर्थन गर्नु पर्नेछ।