इंग्लिस प्रिमियर लिगमा साविक विजेता लिभरपुल र शीर्ष स्थानको एभर्टनले शनिबार रोमाञ्चक बराबरी खेलका छन्।
एभर्टनको घरेलु मैदानमा भएको खेल २-२ गोलको बराबरीमा सकिएको हो। खेलमा एभर्टन १० खेलाडीमा सीमित भएको थियो भने लिभरपुलले दोस्रो हाफको इन्जुरी टाइममा गरेको गोललाई अफसाइड घोषित गरिएको थियो।
खेलमा अग्रता लिभरपुलले लियो। साडियो मानेले खेलको तेस्रो मिनेटमै गोल गरेर लिभरपुललाई अग्रता दिलाएका थिए।
खेलको १९ मिनेटमा एभर्टनका मिकेल केनले बराबरी गोल फर्काउन सफल भए।
खेलको ७२ मिनेटमा मोहमद सलाहले गोल गर्दै लिभरपुललाई दोस्रो पटक अग्रता दिलाए।
तर ८१ मिनेटमा एभर्टनले फेरि बराबरी गोल गर्न सफल भयो। एभर्टनका लागि कल्भर्ट लेविनले बराबरी गोल गरे।
खेलको अन्तिम मिनेटमा एभर्टन १० खेलाडीमा सीमित बन्यो। एभर्टनका रिचार्लीसनलाई रेफ्रीले रातो कार्ड देखाउँदै मैदान बाहिर पठाए। उनले थियोगोलाई फल गरेका कारण रातो कार्ड देखाइएको थियो।
इन्जुरी टाइमको तेस्रो मिनेटमा लिभरपुलका हेन्डर्सनले बललाई जाली चुमाएका थिए। तर भिएआर मार्फत रिभ्यू हेर्दा लिभरपुलका साडियो माने अफसाइड पोजिसनमा देखिएका थिए।
अंक तालिकामा एभर्टन शीर्ष स्थानमा कायम छ। एभर्टनले ५ खेलबाट १३ अंक जोडेको छ। दोस्रो लिभरपुलको समान खेलबाट १० अंक छ।
