जापानी फुटबलका लिजेन्ड ५९ वर्षीय काजुयोशी मियुराले सन् २०२२ पछि आफ्नो पहिलो गोल गरेका छन्।
विश्वकै सबैभन्दा पाका व्यावसायिक फुटबलरका रूपमा चिनिने मियुराले जापानको तेस्रो श्रेणीको क्लब 'फुकुसिमा युनाइटेड' बाट खेल्दै यो सफलता हात पारेका हुन्।
गत शनिबार भएको 'एम्परर्स कप' मा फुकुसिमा युनाइटेडले इवाकी फुरुकावालाई ७–० को फराकिलो अन्तरले हराएको थियो।
उक्त खेलको ५२ औँ मिनेटमा मियुराले गोल गर्दै टोलीलाई ५–० को स्थितिमा पुर्याएका थिए। सन् २०२२ को नोभेम्बरमा सुजुका पीजी (अहिलेको एथ्लेटिको सुजुका) का लागि गोल गरेयता यो उनको पहिलो प्रतिस्पर्धात्मक गोल हो।
जापानमा 'किङ काजु' को उपनामले चिनिने मियुरा त्यहाँका सबैभन्दा प्रिय खेलाडीमध्ये एक हुन्। सन् १९९३ मा जापानको 'जे लिग' सुरु हुँदा उनी नै फुटबलको मुख्य अनुहार थिए।
मियुराले आफ्नो खेल जीवन सन् १९८६ मा ब्राजिलको सान्तोस क्लबबाट सुरु गरेका थिए। उनले इटाली, क्रोएसिया र अस्ट्रेलियाका क्लबहरूबाट पनि व्यावसायिक फुटबल खेलिसकेका छन्।
मियुराको यो लोभलाग्दो खेल यात्रा अब ४२ औँ सिजनमा प्रवेश गर्दैछ। उनले फुकुसिमासँगको आफ्नो सम्झौता सन् २०२७ को जुनसम्मका लागि थप गरेका छन्। उनले सन् २००५ मा योकोहामा एफसीसँग सम्झौता गरेका थिए।
जापानको राष्ट्रिय टोलीका लागि ८९ खेल खेल्दै ५५ गोल गरेका मियुराले यसअघि नै आफू ६० वर्षको उमेरसम्म फुटबल खेल्न चाहेको बताएका थिए।
