नेपाल सुपर लिग (एनएसएल) ले नेपाल फुटबल लिग (एनएफएल) आयोजना गर्ने तयारीप्रति असन्तुष्टि जनाउँदै अर्को कुनै लिग गर्न आफूले अनुमति नदिएको स्पष्ट पारेको छ।
एनएफएलको पहिलो संस्करण आगामी फागुन १ गतेदेखि आयोजना हुने खबर सार्वजनिक भएपछि एनएसएलले मंगलबार प्रेस विज्ञप्ति जारी गर्दै अर्को लिग लागि कुनै स्वीकृति वा अनुमति नदिएको जनाएको हो। एनएफएलमा एनएसएलका सात टोलीले खेल्ने भएपछि यस्तो प्रतिक्रिया आएको हो।
एनएसएलका प्रबन्ध निर्देशक श्रेयन्स कार्कीले जारी गरेको विज्ञप्तिमा नेपालमा मान्यता प्राप्त एकमात्र राष्ट्रव्यापी तथा सहरमा आधारित फुटबल लिग आयोजना गर्ने अधिकार आफूहरूसँग रहेको दाबी गरिएको छ।
‘हालैका समाचारमा आएजस्तो अन्य कुनै लिगका सम्बन्धमा एनएसएलले स्वीकृति वा अनुमति दिएको छैन,’ विज्ञप्तिमा भनिएको छ।
एनएसएलले नेपाली फुटबलको विकासका लागि आफ्नो दीर्घकालीन दृष्टिकोण, अधिकार र जिम्मेवारीप्रति प्रतिबद्ध रहेको पनि जनाएको छ। यद्यपि, नयाँ लिगबारे आफ्नो धारणा स्पष्ट पार्दै एनएसएलले यस विषयमा आगामी कदम तय गर्ने काम भइरहेको र थप विवरण पछि सार्वजनिक गरिने बताएको छ।
‘नेपाली फुटबलको भविष्य खेलाडी र समर्थकको हितलाई केन्द्रमा राखेर सहकार्य, आपसी सम्मान र साझा प्रतिबद्धताका साथ अघि बढ्दा मात्रै राम्रो हुने हाम्रो विश्वास छ,’ विज्ञप्तिमा उल्लेख छ।
अखिल नेपाल फुटबल संघ (एन्फा) फिफाको निलम्बनमा रहेपछि नेपाली फुटबलको घरेलु प्रतियोगिता सञ्चालनबारे अन्योल देखिएको छ। सरकारी हस्तक्षेप भएको भन्दै फिफाले एन्फालाई निलम्बन गरेपछि घरेलु लिगसहित यसअघि सञ्चालन हुँदै आएको एनएसएलसमेत प्रभावित भएको छ।
एनएफएलको पहिलो संस्करण फागुन १ गतेदेखि सञ्चालन गर्ने तयारी गरिएको छ।
एनएफएलको पहिलो संस्करणमा एनएसएलमा सहभागी हुँदै आएका काठमाडौं रेजर्स, ललितपुर सिटी, एफसी चितवन, पोखरा थन्डर्स, बुटवल लुम्बिनी, धनगढी एफसी र झापा एफसीले प्रतिस्पर्धा गर्ने तयारी छ। यी फ्रेञ्चाइज टिमले एनएफएल खेल्ने भएपछि एनएसएले आपत्ति जनाएको हो।
