यूईएफए नेसन्स लिगमा विश्व च्याम्पियन स्पेन र इंग्ल्यान्डले सानदार जित निकाल्दै आफ्नो अभियानलाई बलियो बनाएका छन्। स्पेनले चेक रिपब्लिकलाई ४–१ ले हराउँदा इंग्ल्यान्डले क्रोएसियामाथि ७–० को फराकिलो जित दर्ता गर्यो।
ओभिएडोमा स्पेनले सुरुवातदेखि नै प्रभाव जमायो। छैटौं मिनेटमै लामिन यामालले तीन डिफेन्डरको घेराबीच पेनाल्टी क्षेत्रबाहिरबाट उत्कृष्ट प्रहार गर्दै स्पेनलाई अग्रता दिलाए।
३५औं मिनेटमा रोड्रीले स्पेनको अग्रता दोब्बर बनाए। डानी ओल्मोसँग तालमेल गर्दै अगाडि बढेका उनले पेनाल्टी क्षेत्र नजिकबाट शक्तिशाली प्रहार गर्दै बललाई गोलको माथिल्लो कुनामा पुर्याए।
६९औं मिनेटमा जिरी स्लामाले चेक रिपब्लिकका लागि गोल गर्दै अन्तर २–१ मा झारे। तर चेक टोलीका लाडिस्लाभ क्रेजी दुई पहेँलो कार्ड पाएपछि मैदानबाट बाहिरिएपछि स्पेनलाई थप सहज भयो।
८९औं मिनेटमा मिकेल मेरिनोले गोल गर्दै स्पेनको ४–१ को जित पक्का गरे।
यो जितसँगै स्पेनको लगातार जितको संख्या १० पुगेको छ। समूह ‘ए३’ मा तीन खेलबाट नौ अंकसहित स्पेन शीर्ष स्थानमा छ। दोस्रो स्थानमा रहेको इंग्ल्यान्डभन्दा ऊ तीन अंकले अगाडि छ।
उता रिजेकामा इंग्ल्यान्डले क्रोएसियाविरुद्ध सुरुदेखि नै आक्रामक प्रदर्शन गर्यो। आठौं मिनेटमै जोस्को ग्भार्डिओलको गल्तीको फाइदा उठाउँदै ह्यारी केनले गोल गरे।
२१औं मिनेटमा जुड बेलिङ्घमले अग्रता दोब्बर बनाए। त्यसपछि एन्थोनी गोर्डनले गोल गर्दै इंग्ल्यान्डलाई ३–० को अवस्थामा पुर्याए। पहिलो हाफ सकिनुअघि बुकायो साकाले चौथो गोल थपे।
दोस्रो हाफ सुरु भएको आठ मिनेटमै केनले व्यक्तिगत दोस्रो गोल गरे। त्यसपछि क्रोएसियाको कमजोर डिफेन्सको फाइदा उठाउँदै साकाले अर्को गोल गरे।
वैकल्पिक खेलाडी मोर्गन रोजर्सले गोल थपेपछि इंग्ल्यान्डले ७–० को अविश्वसनीय जित हात पार्यो।
स्पेनसँग सुरुवाती खेल गुमाएपछि चेक रिपब्लिकलाई हराएको इंग्ल्यान्डले क्रोएसियाविरुद्ध भने अझ प्रभावशाली प्रदर्शन गरेको हो। थोमस टुचेलको नेतृत्वमा इंग्ल्यान्डको यो प्रदर्शनलाई अहिलेसम्मकै उत्कृष्टमध्ये एक मानिएको छ।
स्पेन र इंग्ल्यान्ड दुवै अब समूह ‘ए३’ को शीर्ष स्थानका लागि प्रतिस्पर्धामा छन्। स्पेनले मंगलबार क्रोएसियाको सामना गर्नेछ भने इंग्ल्यान्डको उत्कृष्ट जितले समूहको प्रतिस्पर्धालाई थप रोचक बनाएको छ।
