सिद्धार्थ बैंक नेपाल प्रिमियर लिग (एनपिएल) अन्तर्गत शुक्रबार अस्ट्रेलियन ब्याटरद्वय जोश ब्राउन र क्रिस लिनको बिस्फोटक ब्याटिङको मद्दतमा सुदूरपश्चिम रोयल्सले पोखरा एभेन्जर्सविरूद्ध ७ विकेटको क्षतिमा १९३ रन जोडेको छ।
कीर्तिपुरस्थित त्रिवि मैदानमा टस जितेको पोखराले फिल्डिङ रोजेपछि पहिले ब्याटिङ गरेको सुदूरपश्चिमले १० ओभरमै ९९ रन पूरा गरेको थियो।
सुदूरपश्चिमका अस्ट्रेलियन ओपनर जोस ब्राउनले ३५ बलमा ६ चौका र ५ छक्का प्रहार गर्दै ६८ रन जोडे। उनी ११औं ओभरको दोस्रो बलमा आउट हुँदा सुदूरपश्चमले १०८ रन जोडेको थियो। उनी पोखराका जिमी निशमको बलमा किरण ठगुन्नाबाट क्याच भए। ब्राउनले विनोद भण्डारीसँग १०८ रनको ओपनिङ साझेदारी गरे।
त्यसपछि अर्का अस्ट्रेलियन ब्याटर क्रिस लिन पनि आक्रामक रूपमा प्रस्तुत भए। उनले १३ बलमा ३१ रन प्रहार गर्दा ४ चौका र २ छक्का हाने। उनले १३औं ओभरमा निशमविरूद्ध ३ चौका र २ छक्का प्रहार गरेका थिए। नो बल समेत फ्याँकेका निशमले सो ओभरमा २६ रन खर्चिएका थिए।
त्यसपछि सुदूरपश्चिमका कप्तान दीपेन्द्रसिंह ऐरी १० बलमा १५ रन जोडेर आउट भए। विनोद भण्डारीले ४२ बलमा ६ चौकाको मद्दतमा ४३ रनको योगदान गरे।
काठमाडौंविरूद्धको अघिल्लो खेलमा उत्कृष्ट ब्याटिङ गरेका हर्मित सिंहले ४ रन मात्र जोड्न सके। यस्तै स्कट कुगेइलिने पनि ८ रनमा आउट भए। अन्तिम ओभरको पाँचौ बलमा आरिफ शेख शून्यमा एलबिडब्लूको धरापमा परे।
बलिङमा पोखराका जिमी निशमले ३ विकेट लिए। उनले ४ ओभरमा ४७ रन खर्चिए। आकाश चन्द र डान डाउथवेटले २-२ विकेट लिन सफल भए। आकाशले ४४ रन खर्चिदा डानले २४ रन मात्र दिए।
पहिलो खेलमा सुदुरपश्चिमले काठमान्डु गोर्खाजलाई पराजित गरेको थियो। यस्तै पोखरा भने पहिलो खेलमा विराटनगरसँग हारेको थियो। पोखराविरूद्ध विराटनगरले २२० रनको कीर्तिमानी स्कोर बनाएको थियो।
पोखरा एभेन्जर्स
कुशल भुर्तेल (कप्तान), दिनेश खरेल, किरण ठगुन्ना, सागर ढकाल, अभिषेक तिवारी,आकाश चन्द, विपिन खत्री, सुमित बर्मा, एडम रोसिङटन, ड्यानियल डाउथवेट, जिमी निशम।
सुदूरपश्चिम रोयल्स:
दीपेन्द्रसिंह ऐरी (कप्तान), आरिफ शेख, अभिनास बोहरा, नरेन साउद, इशान पाण्डे, बिनोद भण्डारी, हेमन्त धामी, क्रिस लिन, स्कट कुगेलेइन, जोस ब्राउन, हरमीत सिंह
-1746009348.jpg)
