सिद्धार्थ बैंक नेपाल प्रिमियर लिग (एनपिएल) अन्तर्गत शुक्रबार सुदूरपश्चिम रोयल्सले लगातार दोस्रो जित निकालेको छ।
कीर्तिपुरस्थित त्रिवि मैदानमा अस्ट्रेलियन ब्याटर चलेको खेलमा सुदूरपश्चिमले पोखरा एभेन्जर्सलाई १८ रनले पराजित गरेको हो।
यसअघि पहिलो खेलमा सुदूरपश्चिमले काठमान्डु गोर्खाजलाई पराजित गरेको थियो। पोखराको भने यो लगातार दोस्रो हार हो। पहिलो खेलमा पोखराले विराटनगर किंग्ससँग पराजय भोगेको थियो।
सुदूरपश्चिमले दिएको १९४ रनको विशाल लक्ष्य पछ्याएको पोखराले २० ओभरमा ८ विकेटको क्षतिमा १७५ रन बनाउन सक्यो।
पोखराका लागि कप्तान कुशल भुर्तेलले अर्धशतक प्रहार गरे। उनले ५३ रन जोड्ने क्रममा ३२ बलमा ४ चौका र ४ छक्का प्रहार गरे। भुर्तेल १६औं ओभरमा सुदूरपश्चिमका स्कट कुगेइलिनबाट बोल्ड भएपछि पोखरा आशा सकिएको थियो।
खराब सुरूवात गरेको पोखराका जिमी निशमले आक्रमक ब्याटिङ गर्दा पोखरा सम्हालिएको थियो। निशमले २५ बलमा २ चौका र ५ छक्काको मद्दतमा ४७ रन बनाए। उनले कुशल भुर्तेलसँग चौथो विकेटका लागि ७५ रनको साझेदारी गरे। १२औं ओभरको तेस्रो बलमा दीपेन्द्रसिंह ऐरीबाट बोल्ड हुनुअघि उनले सो ओभरमा लगातार दुई छक्का प्रहार गरेका थिए। तेस्रो बलमा निशमलाई बोल्ड गरेपछि दीपेन्द्रले समरसल्ट सेलिब्रेसन गरेका थिए।
पोखराका ओपनिङ ब्याटर एडम रोसिङटन पहिलो ओभरमै १ रनमा रनआउट भए। अर्का ओपनर दिनेश खरेल तेस्रो ओभरमा ६ रनमा आउट हुँदा पोखरा दबाब परेको थियो।
अन्तिममा डान डाउथवेटले एक बल बाँकी छदा आउट हुनुअघि १६ बलमा ३७ रन जोडे पनि जितका लागि पर्याप्त हुन सकेन। उनले १६ बलमा १ चौका र ५ छक्का प्रहार गरेका थिए।
बलिङमा सुदूरपश्चिमका हर्मित सिंहले २ विकेट लिए। कुगेइलिन, ऐरी, हेमन्त धामी, नरेन साउद र अभिनास बोहराले १-१ विकेट लिए।
त्यसअघि अस्ट्रेलियन ब्याटरद्वय जोश ब्राउन र क्रिस लिनको बिस्फोटक ब्याटिङको मद्दतमा सुदूरपश्चिमले 69७ विकेटको क्षतिमा १९३ रन जोड्यो।
कीर्तिपुरस्थित त्रिवि मैदानमा टस जितेको पोखराले फिल्डिङ रोजेपछि पहिले ब्याटिङ गरेको सुदूरपश्चिमले १० ओभरमै ९९ रन पूरा गरेको थियो।
सुदूरपश्चिमका अस्ट्रेलियन ओपनर जोस ब्राउनले ३५ बलमा ६ चौका र ५ छक्का प्रहार गर्दै ६८ रन जोडे। उनी ११औं ओभरको दोस्रो बलमा आउट हुँदा सुदूरपश्चमले १०८ रन जोडेको थियो। उनी पोखराका जिमी निशमको बलमा किरण ठगुन्नाबाट क्याच भए। ब्राउनले विनोद भण्डारीसँग १०८ रनको ओपनिङ साझेदारी गरे।
त्यसपछि अर्का अस्ट्रेलियन ब्याटर क्रिस लिन पनि आक्रामक रूपमा प्रस्तुत भए। उनले १३ बलमा ३१ रन प्रहार गर्दा ४ चौका र २ छक्का हाने। उनले १३औं ओभरमा निशमविरूद्ध ३ चौका र २ छक्का प्रहार गरेका थिए। नो बल समेत फ्याँकेका निशमले सो ओभरमा २६ रन खर्चिएका थिए।
त्यसपछि सुदूरपश्चिमका कप्तान दीपेन्द्रसिंह ऐरी १० बलमा १५ रन जोडेर आउट भए। विनोद भण्डारीले ४२ बलमा ६ चौकाको मद्दतमा ४३ रनको योगदान गरे।
काठमाडौंविरूद्धको अघिल्लो खेलमा उत्कृष्ट ब्याटिङ गरेका हर्मित सिंहले ४ रन मात्र जोड्न सके। यस्तै स्कट कुगेइलिने पनि ८ रनमा आउट भए। अन्तिम ओभरको पाँचौ बलमा आरिफ शेख शून्यमा एलबिडब्लूको धरापमा परे।
बलिङमा पोखराका जिमी निशमले ३ विकेट लिए। उनले ४ ओभरमा ४७ रन खर्चिए। आकाश चन्द र डान डाउथवेटले २-२ विकेट लिन सफल भए। आकाशले ४४ रन खर्चिदा डानले २४ रन मात्र दिए।
एनपिएलमा शनिबार दुई खेल हुनेछन्। विहान सवा ११ बजे कर्णाली याक्स र लुम्बिनी लायन्स भिड्नेछन्। यस्तै दिउँस ३:३० मा विराटनगर किंग्स र काठमान्डु गोर्खाजबीच प्रतिस्पर्धा हुनेछ।
-1746009348.jpg)
