सिद्धार्थ बैंक नेपाल प्रिमियर लिग (एनपिएल) को शुक्रबारको दोस्रो खेल निकै रोमाञ्चक रह्यो।
कर्णाली याक्सविरूद्ध विराटनगर किंग्सले ३ विकेटको रोमाञ्चक जित निकाल्दा नायक बने- स्पिन अलराउन्डर बसिर अहमद।
उनले ४३ बलमा ३ चौका र ३ छक्का प्रहार गरेर नटआउट ६२ रन जोडेर विराटनगरलाई चौथो जित दिलाए।
उनले टोलीका लागि अन्तिम दुई बलमा चार रन चाहिएको स्थितिमा कर्णालीका नन्दन यादवलाई छक्का प्रहार गरेपछि खेल रोमाञ्चक मोडमा पुगेर टुंगिएको थियो।
निकै संघर्षले क्रिकेटर बनेका रूपन्देहीको मायादेवी गाउँपालिका-४ का २२ वर्षीय बसिरले आजको खेलपछि आफ्नी आमालाई सम्झिए सँगसँगै भागवानलाई पनि।
प्रिजेन्टेसन सेरेमोनीमा प्लेयर अफ दि म्याचको ट्रफी लिएपछि उनलाई सोधिएको थियो- आजको खेल कसलाई समपर्ण गर्न चाहानुहुन्छ?
उनको जवाफ थियो- मेरी आमालाई।
क्रिकेटक्रेजी बसिर क्रिकेट सिक्नकै लागि घरभन्दा २० किलोमिटर टाढाको लुम्बिनी सांस्कृतिक नगरपालिका-३ लुम्बिनी नवयुवा क्लबमा जाने गर्थे। उनको क्रिकेटप्रेममा आमाबुबाको पूरा साथ थियो। क्रिकेट सिक्ने क्रममा भैरहवाका प्रशिक्षक बसन्त शाहीले उनको प्रतिभा देखेँ। त्यसपछि उनले एक्सपोजर पाउन थालेका हुन्।
यू-१९ राष्ट्रिय टोलीबाट खेलेपछि चर्चा कमाएका बसिरले त्यसपछि नेपालको यू-१९ टोली हुँदै राष्ट्रिय टोलीबाट समेत खेलिसकेका छन्। तर उनले नियमित भने राष्ट्रिय टोलीमा स्थान पाउन निकै प्रतिस्पर्धा गर्नु परेको छ।
२०७९ को असारमा नामिबियाविरूद्ध उनले राष्ट्रिय टोलीमा डेब्यू गरे। तर उनी निरन्तर भने टोलीमा रहन सकेनन्।
खेलपछि उनले खेल भागवानलाई धन्यवाद दिँदै खेल जिताउने विश्वास भएको बताए।
‘सुरुमा हाम्रो विकेट गएको थियो। त्यसैले एउटा साझेदारी भयो भने खेल फिनिस गर्न सकिन्छ भन्ने विश्वास थियो,’ खेलपछि बसिरले भने, ‘पूरा ओभर खेल्न सकियो भने टिम जित्न सकिन्छ भन्ने मेरो दिमागमा चलिरहेको थियो। आजको दिनका लागि भगवानलाई धन्यवाद भन्न चाहान्छु।’
विपक्षी टोलीका कप्तान सोमपाल कामीले पनि बसिरले उत्कृष्ट खेलेको भन्दै प्रशंसा समेत गरे।
कर्णालीले दिएको १६१ रनको लक्ष्य विराटनगरले ७ विकेटको क्षतिमा एक बल खेल्न बाँकी छदा पूरा गर्दा छक्का प्रहार गरेपछि बसिरले मैदानमा ठूलो खुसी मनाएका थिए।
थ्रीलर बनेको खेलपछि विराटनगरका खेलाडीको सेलिब्रेसन हेर्न लायक थियो। बसिरसँगै ब्याटिङमा रहेका विराटनगरका कप्तान सन्दीप लामिछानेले खुसी मनाउने क्रममा पुसअप गरेका थिए।
त्यसअघि विकेट लिएपछि खुसी मनाउने क्रममा कर्णालीका कप्तान सोमपालले पनि पुसअप गरेका थिए।
त्यसैको जवाफमा सन्दीपले पनि पुसअफ गरेर खुसी मनाएको प्रष्ट संकेत गरेका थिए।
बसिरले जोडेको नटआउट ६२ रन विराटनगरको जितमा महत्वपूर्ण सावित भयो। लगातार विकेट गइरहेको बेला बसिरले सुरुमा सुस्त ब्याटिङ गरे पनि पछि स्ट्राइक रेट बढाएका थिए।
अन्तिम ओभरमा विराटनगरलाई जितका लागि १० रन चाहिएको थियो। जसमा नन्दन यादवले बसिर र सन्दीप लामिछानेविरूद्ध सुरुवाती चार बलमा ६ रन दिएका थिए भने कुनै बाउन्ड्री दिएका थिएनन्। त्यसैले उसलाई अन्तिम दुई बलमा जितका लागि चार रन चाहिएको थियो। तर बसिरले पाँचौ बलमै छक्का प्रहार गरेर खेललाई एक बल बाँकी टुंगाइदिएका थिए।
बसिरले नारायण जोशीसँग ६९ रनको साझेदारी गरेपछि विराटनगर सहज अवस्थामा आएको थियो। जोशीले १६ बलमा २५ रनको योगदान गरे।
त्यसअघि विराटनगरले १२ ओभरमा ५ विकेट गुमाउँदा ६५ रन मात्र जोडेको थियो। विराटनगरका ओपनरद्वय लोकेश बम ६ रन र जर्ज मन्सी शुन्यमा आउट भएका थिए। त्यसपछि साम हिजलेट १९ रन र साहिल पटेल १९ रनमा आउट भए। मस्याङ डि लाङ पनि २ रनमै आउट भएका थिए। तर बसिर र नारायणको जोडी जम्दा ६९ रनको साझेदार भएको थियो। यस्तै डि लाङ पाँचौं विकेटको रुपमा आउट भएपछि विराटनगरले एक बल बाँकी छदै जित निकाल्ने क्रममा ७.५ ओभरमा ९८ रन जोडेको थियो।
हारपछि कर्णालीका कप्तान सोमपाल कामीले धेरै गल्ती गर्दा खेल गुमेको प्रतिक्रिया दिए। साथै आफूले नो बल दिनु पनि गल्ती भएको बताए। खेलमा कर्णालीले स्पिनरको रुपमा खेलाएका विपिन शर्मा र युवराज खत्रीलाई बलिङ गर्न लगाएन। यो विषयमा प्रश्न उठ्दा सोमपालले अनुभवी बलरलाई मौका दिएको प्रतिक्रिया दिए।
यससँगै विराटनगरले चौथो जित निकालेको छ। अघिल्लो खेलमा पराजित भएको विराटनगरले पाँच खेल खेलिसकेको छ। यता चार खेल खेलेको कर्णाली भने तीन खेलमा पराजित भइसकेको छ।
त्यसअघि कीर्तिपुरस्थित त्रिवि मैदानमा दिनको दोस्रो खेलमा टस जितेर पहिले ब्याटिङ गरेको कर्णालीले ३ विकेटको क्षतिमा १६० रन जोड्यो।
कर्णालीका लागि ओपनर प्रियांक पाञ्चालले अर्धशतक प्रहार गरे। उनले ६३ रन बनाउने क्रममा ४७ रनमा ६ चौका र २ छक्का प्रहार गरे। उनले विल बोसिस्टोसँग दोस्रो विकेटका लागि ९६ रनको साझेदारी गरेका थिए। तर पाञ्चाल १७औं ओभरको तेस्रो बलमा रनआउट हुन पुगे। उनलाई विकेटकिपर साहिल पटेलले रनआउटको सिकार बनाएका थिए।
त्यसअघि ओपनिङमा आएका मार्क वाट तेस्रो ओभरमा ६ रनमा मर्स्याङ डि लाङको बलमा जर्ज मुन्सेबाट क्याच भएका थिए।
यस्तै गुल्सन झाले १० बलमा २ चौका र १ छक्काको मद्दतमा २० रनको योगदान गरे। अन्तिमसम्म टिकेका बोसिस्टोले नटआउट ४८ रन बनाए। उनले ४८ बलमा २ चौका प्रहार गरे। नाजिबुल्लाह जाद्रानले ६ बलमा १ छक्काको मद्दतमा १२ रन बनाए।
बलिङमा डि लाङ र कप्तान सन्दीप लामिछानेले १-१ विकेट लिए।
सिजनमा विराटनगरले लगातार तीन खेलमा जित निकाले पनि चौथो खेलमा पराजय भोगेको थियो।
कर्णालीले भने आफ्ना तीनमध्ये दुई खेलमा पराजय र एक खेलमा जित हात पारेको छ।
विराटनगरले खेलका लागि तीन खेलाडी परिवर्तन गरेको थियो। अघिल्लो खेल खेलेका सूर्य तामाङ, नरेन भट्ट र शुभम रन्जेन आजको टोलीमा थिएनन्। आज सुवास भण्डारी, साहिल पटेल र शेहान जर्यासूर्या थिए।
यस्तै कर्णालीमा एक खेलाडी परिवर्तन थियो। अर्जुन घर्तीको स्थानमा विकेटकिपर दिपक डुम्रेले खेलेका थिए।
कर्णाली याक्स
सोमपाल कामी (कप्तान) , दिपक डुम्रे (विकेटकिपर), विपिन प्रसाद शर्मा, नन्दन यादव, पवन सर्राफ, युवराज खत्री, गुल्सन झा, मार्क वाट, विल बोसिस्टो, नजिबउल्लाह जर्दान र प्रियांक पञ्चाल
विराटनगर किंग्स
सन्दीप लामिछाने (कप्तान), लोकेश बम, बसिर अहमद, सुवास भण्डारी, साहिल पटेल (विकेटकिपर), नारायण जोशी, शेहान जर्यासूर्या, जर्ज मुन्से, साम हिजलेट, मर्स्याङ डि लाङ।
-1764347710.jpg)
-1756446574.jpg)
-1746009348.jpg)
