सिद्धार्थ बैंक नेपाल प्रिमियर लिग (एनपिएल) अन्तर्गत मंगलबार दिनको दोस्रो खेलमा एडम रोसिङटनको शतकको मद्दतमा पोखरा एभेन्जर्सले कर्णाली याक्सलाई २०२ रनको विशाल लक्ष्य दिएको छ।
कीर्तिपुरस्थित त्रिवि मैदानमा टस जितेको कर्णालीले बलिङ रोजेपछि पहिले ब्याटिङ गरेको पोखराले २ विकेटको क्षतिमा २०१ रन जोड्यो। जारी सिजनमा २ सय रन कटेको यो पहिलो पटक हो। यसअघि विराटनगर किंग्सले पोखरा एभेन्जर्सविरूद्ध २२० रन बनाएको थियो।
३२ वर्षीय इंग्ल्यान्डका विकेटकिपर ब्याटर रोसिङटनले ५५ बलमा शतक पूरा गरेका थिए। शतक पूरा गर्न उनले ११ चौका र ६ छक्का प्रहार गरे। उनी १०८ रनमा नटआउट रहदा कुल ५८ बलमा खेलेर ११ चौका र ७ छक्का प्रहार गरे।
यो जारी सिजनको दोस्रो शतक हो। यसअघि कर्णालीका मार्क वाटले लुम्बिनी लायन्सविरूद्ध शतक प्रहार गरेका थिए। अघिल्लो संस्करणमा पोखराका लागि आन्द्रेस गौसले शतक प्रहार गरेका थिए। त्यसैले यो एनपिएलको समग्र तेस्रो शतक हो।
पोखराका कप्तान तथा ओपनर कुशल भुर्तेलले १८ रन जोडेका थिए। उनले रोसिङटनसँग ४.५ ओभरमा ३४ रनको ओपनिङ साझेदारी गरेका थिए।
भुर्तेल आउट भएपछि क्रिजमा आएका जासन रोयसँग रोसिङटनको जोडी जम्यो। दुईबीच दोस्रो विकेटका लागि १२ ओभरमा १२७ रनको साझेदारी हुँदा पोखराको बलियो स्थितिमा रह्यो।
एनपिएलमा डेब्यू गरेका रोय अर्धशतक बनाउन भने चार रनले चुके। उनले ३४ बलमा ४६ रन बनाउँदा २ चौका र ३ छक्का प्रहार गरे। उनी १७औं ओभरको पाँचौ बलमा क्याच भए। उनलाई नन्दन यादवले प्रियांक पाञ्चलबाट क्याच गराए।
अन्त्यमा धनञ्जय लक्षनले ११ बलमा नटआउट २३ रन बनाएपछि पोखराले २ सय रन कटायो।
बलिङमा कर्णालीका नन्दन यादव र मार्क वाटले १-१ विकेट लिए।
प्लेअफमा पुग्नका लागि दुवै टोलीलाई जितको आवश्यकता छ। दुवैले एक एक खेल जितेका छन्। यद्यपी कर्णालीले एक खेल बढी खेलेको छ। त्यसैले आजको खेलमा हार ब्यहोरे कर्णाली अन्तिम खेलअघि बाहिरनेछ।
यता कर्णालीले आजको खेलमा पराजय भोगेमा पोखरा पनि लगभग बाहिरनेछ। अहिलेसम्म कर्णालीले पाँच र पोखराले चार खेल खेलेका छन्।
खेलका लागि कर्णाली तीन खेलाडी परिवर्तन गरेको छ। दिपक डुम्रे, युवराज खत्री र विल बोसिस्टो टोलीमा छैनन्। आज दिपेन्द्र रावत, युनिस ठकुरी र जयकिशन कोल्सवाला खेल्दैछन्।
पोखरामा भने पाँच खेलाडी परिवर्तन गरिएको छ। जिमी निशम युएईको आइएलटी-२० खेल्न फर्किएका छन् भने दिनेश खरेल, अभिषेक तिवारी, सुमित बर्मा र माट टेलर टोलीमा छैनन्। आज आकाश चन्द, सन्दीप केसी, जासन रोय, ऋषि धवन र धनञ्जय लक्षन खेल्दैछन्।
कर्णाली याक्स
सोमपाल कामी (कप्तान), दिपेन्द्र रावत, विपिन प्रसाद शर्मा, नन्दन यादव, पवन सर्राफ, युनिस ठकुरी, गुल्सन झा, मार्क वाट, जयनकिश कोल्सावाल (विकेटकिपर), नजिबउल्लाह जर्दान र प्रियांक पञ्चाल
पोखरा एभेन्जर्स
कुशल भुर्तेल (कप्तान), सन्दीप केसी, किरण ठगुन्ना, सागर ढकाल, तृतराज दास, आकाश चन्द, विपिन खत्री, ऋषि धवन, एडम रोसिङटन (विकेटकिपर), धनञ्जय लक्षन्, जासन रोय।
-1746009348.jpg)
