सिद्धार्थ बैंक नेपाल प्रिमियर लिग (एनपिएल) को यो सिजन एकै इनिङ्ग्समा सर्वाधिक रन बनाउने कीर्तिमान बनाउने टोली हो- विराटनगर किंग्स।
विराटनगरले सिजनको पहिलो खेलमा पोखरा एभेन्जर्सविरूद्ध २२० रन प्रहार गरेको थियो। पोखराले आफ्नो पहिलो खेलमै त्यति ठूलो लक्ष्य पाउँदा पनि आशावादी देखिएको थियो।
किनभने टोलीमा थिए- इंग्लिस विकेटकिपर ‘हार्ड हिटर’ एडम रोसिङटन। ३२ वर्षीय रोसिङटनले इंग्ल्यान्डका यू-१९ टोलीबाट खेलेका विकेटकिपर हुन्। उनी पछिल्ला वर्षमा इंग्लिस क्रिकेटका ‘पावर हिटिङ’ का लागि चर्चित छन्। उनले १८६ टी-२० खेलमा ३५ सय बढी रन बनाइसकेका थिए।
नभन्दै उनले विराटनगरविरूद्धको उक्त खेलमा आक्रामक सुरुवात दिलाएका थिए। तर उनी २१ बलमा ३९ रन बनाएर आउट हुन पुगे। कुशल भुर्तेलले ३१ बलमा ५९ रन बनाउँदा पोखराले १६७ रन बनाउन सक्यो। खेलपछि कप्तान भुर्तेलले रोसिङटनसहित आफू टिकेको भए २२१ प्रहार गर्न सक्ने बताएका थिए।
त्यसपछि रोसिङटन दुई खेलमा चल्न सकेनन्। लुम्बिनीविरुद्धको लिगको चौथो खेलमा भने उनले आफ्नो क्षमता देखाए। उनले ६३ बलमा ८१ रन बनाए। तर लुम्बिनीविरूद्ध पोखराले हार टार्न सकेन।
मंगलबार भने रोसिङटन आक्रामक रूपमा प्रस्तुत भए। उनी कर्णाली याक्सका बलरविरूद्ध लगातार हाबी भए। ओपनिङमा आएका उनी अन्त्यसम्म मैदानमा टिके। ५८ बल खेले अनि बनाए नटआउट १०८ रन। उनले ८६ रन त बाउन्ड्रीबाटै जोडे। जसमा ११ चौका र ७ छक्का समावेश छन्। आजै एनपिएलमा डेब्यू गरेका अर्का इंग्लिस ब्याटर जासन रोयले ३४ बलमा ४६ रन जोडेपछि पोखराले कर्णालीविरूद्ध २ विकेटको क्षतिमा २०१ रन जोड्यो।
जवाफमा ब्याटिङ गरेको कर्णाली १६७ रनमा अलआउट हुँदा पोखराले ३४ रनको जित निकाल्यो र प्लेअफ सम्भावना जीवित नै राख्यो। २ क्याच समेत लिएका विकेटकिपर रोसिङटन प्लेयर अफ दि म्याच भए। रोसिङटनकै योगदानमा दोस्रो जित निकालेको पोखराले अब बाँकी रहेका दुवै खेल जिते प्लेअफमा पुग्ने बाटो खुला राखेको छ।
रोसिङटनले प्रहार गरेको शतक जारी सिजनको दोस्रो शतक हो। यसअघि कर्णालीका मार्क वाटले लुम्बिनी लायन्सविरूद्ध शतक प्रहार गरेका थिए। अघिल्लो संस्करणमा पोखराका लागि आन्द्रेस गौसले शतक प्रहार गरेका थिए। त्यसैले यो एनपिएलको समग्र तेस्रो शतक हो।
खेलपछि रोसिङटनले रोयसँग राम्रो साझेदारी गरेपछि ब्याटिङ गर्न सजिलो भएको बताए।
‘रोय एकदमै राम्रा खेलाडी हुन्। साझेदारी शानदार थियो, यसले दबाब हटायो। हामीले स्पिनमाथि पकड जमायौँ र त्यसपछि अन्तिम चरणमा त्यसको फाइदा उठाउन सक्यौँ,’ उनले भने, ‘विकेट धेरै राम्रो थियो। त्यसैले उनीहरूले राम्रो सुरुवात गरे, कर्णालीका मार्क वाटले उत्कृष्ट खेले। त्यसैले उनी हाम्रो लागि ठूलो विकेट थिए।’
रोसिङटन इंग्लिस क्रिकेटमा आक्रामक शैलीका विकेटकिपर-ब्याट्सम्यान रुपमा परिचित छन्। जुन उनले मंगलबार त्रिवि मैदानमा प्रमाणित गरेर देखाए।
उनले इंग्लिस क्लब नर्थह्याम्पटनशायर क्लबमा आठ सिजन बिताउँदा उत्कृष्ट प्रदर्शन गरे। त्यहाँ रहँदा उनले टोलीलाई 'टी-२० ब्लास्ट' को उपाधि जिताउन मद्दत गरे र पछि क्लबको कप्तान पनि बने।
आक्रामक सट प्रहार गर्ने क्षमताका कारण उनले 'लण्डन स्पिरिट' बाट 'द हन्ड्रेड' प्रतियोगिता खेल्ने मौका पाए। विदेशी लिगहरूमा पनि उनको माग बढ्दै गयो, जसले गर्दा उनले अबु धाबी टी-१० र दक्षिण अफ्रिकाको एसए-२० जस्ता लिगहरूमा समेत आफ्नो स्थान बनाए।
सन् २०१९ को सिजनको बीचतिर रोसिङ्टनले नर्थह्याम्पटनशायरको कप्तानी सम्हाले। उनकै नेतृत्व र सर्वाधिक रनको योगदानले गर्दा टोली २०१३ पछि पहिलो पटक च्याम्पियनसिपमा बढुवा भयो।
सन् २०२० र २०२१ को कोभिड महामारीको समयमा पनि उनी कप्तान नै रहे। तर, नयाँ मुख्य प्रशिक्षक जोन स्याडलरसँगको मनमुटावका कारण उनले माथिल्लो डिभिजनमा टोलीको नेतृत्व गर्न पाएनन्। त्यसपछि उनी लोनमा एसेक्स गए र केही महिनापछि त्यहीँ स्थायी रूपमा अनुबन्धित भए।
नर्थ लण्डनको मिल हिल स्कुल र मिडिलसेक्सको युवा टोलीबाट हुर्किएका रोसिङ्टनले सन् २००९ मा मिडिलसेक्सको दोस्रो रोजाइको टोलीबाट पहिलो इनिङमै नर्थह्याम्पटनशायर विरुद्ध १६१ रन बनाएका थिए।
अर्को सिजन उनले प्रथम श्रेणी क्रिकेटमा डेब्यू गरे। सोही वर्ष इंग्ल्याण्डको यू-१९ टोलीबाट श्रीलंका विरुद्धको खेलमा विष्फोटक शतक प्रहार गर्दै उनले सबैको ध्यान ताने। उनको पहिलो प्रथम श्रेणी शतक (क्याम्ब्रिज एमसीसीयू विरुद्ध ५७ बलमा) बनाउदा लगातार पाँच छक्का समावेश थिए।
मिडिलसेक्समा अर्का विकेटकिपर जोन सिमसन भएकाले रोसिङ्टनले कमै मौका पाए। सिमसन पनि अहिले नेपाल प्रिमियर लिग खेल्न नेपालमै छन्। उनी काठमान्डु गोर्खाजमा आबद्ध छन्।
सन् २०१४ मा नर्थह्याम्पटनशायर डिभिजन वनबाट रेलिगेसनमा पर्दा टोलीका लागि राम्रो प्रदर्शन गर्ने थोरै खेलाडीमध्ये रोसिङ्टन एक थिए। उनले ४६५ रन बनाए र सिजनको अन्त्यमा क्लबसँग स्थायी सम्झौता गरे।
सन् २०१६ मा नर्थह्याम्पटनशायरले 'टी-२० ब्लास्ट' जित्दा उनले महत्त्वपूर्ण भूमिका खेले। क्वार्टर फाइनलमा मिडिलसेक्स विरुद्ध उनले अर्धशतक बनाए। साथै ससेक्स विरुद्ध नटआउट १३८ रनको तीव्र इनिङ खेल्दै उनले ब्याटिङमा आफ्नो प्रमाणित गरे, जुन उनको करियरकै उत्कृष्ट इनिङ थियो।
पोखराको आशा बाँकी
पोखरासँग पराजित भएसँगै कर्णाली याक्स भने लिग चरणबाट बाहिरिने पहिलो टोली भएको छ।
कर्णालीलाई पोखरा एभेन्जर्सले ३४ रनले पराजित गर्यो। अन्तिम खेलअघि २ अंक मात्र जोडेको कर्णालीले अन्तिम जिते पनि शीर्ष चारमा रहेर प्लेअफमा पुग्नेछैन।
किनकी ४-४ अंक जोडेका पोखरा र चितवन राइनोजले एक आपसमा खेल्न बाँकी छ। जसका कारण यी मध्ये एक टोलीको ६ अंक हुनेछ भने अन्तिम खेलमा जित निकाले पनि कर्णाली बाहिरिनेछ।
सुदूरपश्चिम रोयल्स १० अंक जोडेर प्लेअफ पुगिसकेको छ। दोस्रो स्थानको विराटनगर किंग्स र तेस्रो स्थानको काठमान्डु गोर्खाजको ८-८ अंक छ भने उनीहरू प्लेअफ नजिक छन्।
कर्णालीले ६ खेल खेल्दा २ अंक मात्र छ। उसले १ खेल मात्र जित्दा ५ खेलमा पराजय भोग्यो।
आजको खेलमा जित निकालेको पोखराले पाँच खेलमा दोस्रो जित निकाल्यो भने ४ अंक जोड्यो। अब अन्तिम दुई खेलमा उसले जित निकाले प्लेअफ पुग्ने सम्भावना हुनेछ।
मंगलबार एडम रोसिङटनको शतकको मद्दतमा पोखरा एभेन्जर्सले कर्णाली याक्सलाई २०२ रनको विशाल लक्ष्य दिएको थियो। जुन लक्ष्य पछ्याएको कर्णाली १९ ओभरमा १६७ रनमा अलआउट भयो।
पोखराका लागि ओपनिङमा आएका मार्क वाटले ३४ बलमा ५९ रन जोडेका थिए। उनले ४ चौका र ५ छक्का प्रहार गरे।अरु ब्याटर भने चल्न सकेनन्।
उनीसँगै ओपनिङमा आएका प्रियांक पाञ्चाल १६ रन, जयकिसन कोल्सावाला ६ रन, पवन सर्राफ १९ रन, नाजिबुल्लाह जाद्रान २४ रन र गुल्सन झा ९ रनमा आउट भए। दीपेन्द्र रावत पनि १० रनमा रनआउट भए।
कप्तान सोमपाल कामी १३ रन बनाएर आउट भएसँगै कर्णालीको आशा सकियो।
बलिङमा पोखराका डेब्यू खेलाडी ऋषि धवनले ३ विकेट लिए। भारतको राष्ट्रिय टोलीसहित आइपिएल टोली पञ्जाव, कोलकता र मुम्बईबाट खेलेका धवनले ४ ओभरमा ३७ रन दिए। यस्तै धनञ्जय लक्षमले पनि ३ विकेट हात पारे। उनले ४ ओभरमा ३१ रन दिए।
टस जितेको कर्णालीले बलिङ रोजेपछि पहिले ब्याटिङ गरेको पोखराले २ विकेटको क्षतिमा २०१ रन जोड्यो। जारी सिजनमा २ सय रन कटेको यो पहिलो पटक हो। यसअघि विराटनगर किंग्सले पोखरा एभेन्जर्सविरूद्ध २२० रन बनाएको थियो।
३२ वर्षीय इंग्ल्यान्डका विकेटकिपर ब्याटर रोसिङटनले ५५ बलमा शतक पूरा गरेका थिए। शतक पूरा गर्न उनले ११ चौका र ६ छक्का प्रहार गरे। उनी १०८ रनमा नटआउट रहदा कुल ५८ बलमा खेलेर ११ चौका र ७ छक्का प्रहार गरे।
यो जारी सिजनको दोस्रो शतक हो। यसअघि कर्णालीका मार्क वाटले लुम्बिनी लायन्सविरूद्ध शतक प्रहार गरेका थिए। अघिल्लो संस्करणमा पोखराका लागि आन्द्रेस गौसले शतक प्रहार गरेका थिए। त्यसैले यो एनपिएलको समग्र तेस्रो शतक हो।
पोखराका कप्तान तथा ओपनर कुशल भुर्तेलले १८ रन जोडेका थिए। उनले रोसिङटनसँग ४.५ ओभरमा ३४ रनको ओपनिङ साझेदारी गरेका थिए।
भुर्तेल आउट भएपछि क्रिजमा आएका जासन रोयसँग रोसिङटनको जोडी जम्यो। दुईबीच दोस्रो विकेटका लागि १२ ओभरमा १२७ रनको साझेदारी हुँदा पोखराको बलियो स्थितिमा रह्यो।
एनपिएलमा डेब्यू गरेका रोय अर्धशतक बनाउन भने चार रनले चुके। उनले ३४ बलमा ४६ रन बनाउँदा २ चौका र ३ छक्का प्रहार गरे। उनी १७औं ओभरको पाँचौ बलमा क्याच भए। उनलाई नन्दन यादवले प्रियांक पाञ्चलबाट क्याच गराए।
अन्त्यमा धनञ्जय लक्षनले ११ बलमा नटआउट २३ रन बनाएपछि पोखराले २ सय रन कटायो।
बलिङमा कर्णालीका नन्दन यादव र मार्क वाटले १-१ विकेट लिए।
खेलका लागि कर्णाली तीन खेलाडी परिवर्तन गरेको थियो। दिपक डुम्रे, युवराज खत्री र विल बोसिस्टो टोलीमा छैनन्। आज दिपेन्द्र रावत, युनिस ठकुरी र जयकिशन कोल्सवाला खेले।
पोखरामा भने पाँच खेलाडी परिवर्तन गरिएको थियो। जिमी निशम युएईको आइएलटी-२० खेल्न फर्किए भने दिनेश खरेल, अभिषेक तिवारी, सुमित बर्मा र माट टेलर टोलीमा थिएनन्। आज आकाश चन्द, सन्दीप केसी, जासन रोय, ऋषि धवन र धनञ्जय लक्षन खेलेका थिए।
कर्णाली याक्स
सोमपाल कामी (कप्तान), दिपेन्द्र रावत, विपिन प्रसाद शर्मा, नन्दन यादव, पवन सर्राफ, युनिस ठकुरी, गुल्सन झा, मार्क वाट, जयनकिश कोल्सावाल (विकेटकिपर), नजिबउल्लाह जर्दान र प्रियांक पञ्चाल
पोखरा एभेन्जर्स
कुशल भुर्तेल (कप्तान), सन्दीप केसी, किरण ठगुन्ना, सागर ढकाल, तृतराज दास, आकाश चन्द, विपिन खत्री, ऋषि धवन, एडम रोसिङटन (विकेटकिपर), धनञ्जय लक्षन्, जासन रोय।
-1746009348.jpg)
