सिद्धार्थ बैंक नेपाल प्रिमियर लिगमा साविक उपविजेता सुदूरपश्चिम रोयल्स शीर्ष दुईमा पर्दै क्वालिफायरमा पुगेको छ।
कीर्तिपुरस्थित त्रिवि मैदानमा बिहीबार भएको दोस्रो खेलमा चितवन राइनोजलाई ४९ रनले पराजित गर्दै सुदूरपश्चिमले लगातार ६ खेलमा जित निकालेर शीर्ष दुई स्थान पक्का गरेको हो।
सुदूरपश्चिमले दिएको १७० रनको लक्ष्य पछ्याएको चितवन १७.१ ओभरमा १२० रनमै अलआउट भयो।
लगातार छैटौं जित निकालेको शीर्ष स्थानको सुदूरपश्चिमले १२ अंक जोडेको छ। अब उसले मंगलबार शीर्ष दुईमा पर्ने अर्को टोलीसँग प्रतिस्पर्धा गर्नेछ। जित हात पारे उसले फाइनलमा स्थान बनाउनेछ। पराजय भए पनि उसले फाइनलमा स्थान बनाउनका लागि दोस्रो क्वालिफायरको मौका पाउनेछ।
सुदूरपश्चिमको जितसँगै विराटनगर किंग्स पनि प्लेअफमा पुगेको छ। यसअघि आजै काठमान्डु गोर्खाजले पनि प्लेअफमा स्थान बनाएको थियो। यससँगै सुदूरपश्चिम, काठमान्डु र विराटनगर गरी तीन टोलीले प्लेअफमा स्थान पक्का गरेका छन्।
अब एक स्थानको लागि चितवनसँगै, लुम्बिनी लायन्स, पोखरा एभेन्जर्स र जनकपुर बोल्ट्सको सम्भावना हुनेछ। लुम्बिनी लायन्स जित हात पारेको खण्डमा भने अरु टोली बाहिरनेछन्। लुम्बिनीको हारले भने अरु टोलीको सम्भावना हुनेछ।
लुम्बिनी लायन्सले भोलि जनकपुर बोल्ट्सलाई पराजित गरे प्लेअफमा पुग्नेछ भने चितवनसँगै पोखरा एभेन्जर्स र जनकपुर बाहिरिनेछन्।
चितवनले अन्तिम खेलमा पोखरासँग र जनकपुरले अन्तिम खेलमा कर्णालीसँग खेल्नेछन्। लुम्बिनी हारेको अवस्थामा यी टोलीले प्लेअफमा पुग्न जित निकाल्नु पर्छ।
बिहीबारको महत्वपूर्ण खेलमा चितवनको कुनै पनि ब्याटरले उल्लेख्य रन जोड्न सकेनन्।
ओपनर अर्जुन साउद १६ रनमा आउट भए। डेभिड मलान र सइफ जइबले ६-६ रन मात्र जोड्न सके। रवी बोपारा २९ रन र कप्तान कुशल मल्ल १५ रन जोडेर पेभिलियन फर्के।
देव खनाल पनि २८ रन जोडेर आउट भएपछि चितवनको आशा सकिएको थियो।
बलिङमा पुनित मेहराले ३ विकेट लिए।
टस जितेको चितवनले फिल्डिङ रोजेपछि पहिले ब्याटिङ गरेको सुदूरपश्चिमले ४ विकेटको क्षतिमा १६९ रन जोड्यो।
उसका लागि ओपनिङ ब्याटर क्रिस लिनले ७५ रन जोडे। १७औं ओभरको समाप्तिमा रिटायर्ड हट भएका लिनले ५६ बलमा ५ चौका र ३ छक्का प्रहार गरे।
अर्का ओपनर विनोद भण्डारी २१ रनमा आउट भए। यस्तै इशान पाण्डे र हर्मित सिंह १-१ रन बनाएर पेभिलियन फर्के।
एनपिएल डेब्यू गरेका पुनित मेहराले १३ रन बनाए। मेहरा र पाण्डेलाई चितवनका सइफ जइबले क्याच गराउँदा डेब्यू इंग्लिस बलर जर्ज स्कृमशले हर्मितलाई आउट गरे। अन्त्यमा कप्तान दीपेन्द्रसिंह ऐरीले १४ बलमा नटआउट २४ रन र आरिफ शेखले १६ बलमा नटआउट २४ रन बनाए।
बलिङमा चितवनका जइबले २ विकेट लिए भने रञ्जित कुमार स्कृमशले १-१ विकेट हात पारे।
-1746009348.jpg)
