सिद्धार्थ बैंक नेपाल प्रिमियर लिग (एनपिएल) अन्तर्गत आज मंगलबारबाट प्लेअफका खेल सुरू हुँदैछन्।
मंगलबार अपराह्न ४ बजे कीर्तिपुरस्थित त्रिवि क्रिकेट मैदानमा सुदूरपश्चिम रोयल्स र विराटनगर किंग्सबीच पहिलो क्वालिफायर हुन लागेको हो। यो खेलको विजेता शनिबार हुने फाइनलमा पुग्नेछ।
सुदूरपश्चिम रोयल्स साविक उपविजेता हो। अघिल्लो सिजन सुदूरपश्चिम फाइनलमा पुगे पनि उपाधि भिडन्तमा जनकपुर बोल्ट्ससँग पराजित भएको थियो।
गत सिजन जस्तै सुदूरपश्चिमले लिग चरणमा उत्कृष्ट खेल देखायो। लिग चरणका ६ खेल लगातार जितेर सुदूरपश्चिमले शीर्ष स्थान पक्का गरेर पहिलो क्वालिफायरमा स्थान बनाएको थियो।
तर लिग चरणको अन्तिम खेलमा भने सुदूरपश्चिमले पराजय भोगेको थियो। सुदूरपश्चिमलाई हराएको थियो, विराटनगर किंग्सले। त्यसैले लिग चरणको अन्तिम खेलको ‘रिम्याच’ को रूपमा मंगलबारको पहिलो क्वालिफायर खेल हुनेछ।
लिग चरणमा विराटनगरले सुरुवाती खेलमा लय समातेको थियो। तर अन्तिम खेलअघि दुई खेल हारेपछि विराटनगरका लागि सुदूरपश्चिमको खेल शीर्ष दुईमा पर्न महत्वपूर्ण थियो।
१४ ओभर नसकिदै लक्ष्य पूरा गर्न पर्ने अवस्थामा विराटनगरले सुदूरपश्चिमले दिएको १४८ रनको लक्ष्य ११.५ ओभरमै पूरा गरिदिएको थियो। खेलमा विराटनगरका दक्षिण अफ्रिकी ब्याटर फा डु प्लेसिसले १९ बलमै अर्धशतक पूरा गर्दा साम हिजलेटमा पनि अर्धशतक प्रहार गरेका थिए।
खेलमा सुदूरपश्चिमका तीव्र बलर स्कट कुगेलिइन र हेमन्त धामीलाई आराम दिइएको थियो। त्यसैले मंगलबारको खेलमा सुदूरपश्चिमले यी बलरबाट विराटनगरका शीर्ष ब्याटरलाई रोक्ने अपेक्षा गरिएको छ।
सुदूरपश्चिमका अस्ट्रेलियन ब्याटरद्वय क्रिस लिन र जोश ब्राउन भने टोलीमा उपलब्ध हुनेछैनन्। घाइते भएका लिन र बिग ब्यास टोलीमा आबद्ध ब्राउन स्वदेश फर्किएका छन्। उनीहरूको स्थानमा भारतका विकेटकिपर ब्याटर सेलडन ज्याकसन र पाकिस्तानी ब्याटर मख्तर मानिया भित्र्याइएको छ। यी दुई ब्याटरले लिन र ब्राउनको स्थान लिन सक्छन् वा सक्दैन त्यो महत्त्वपूर्ण विषय हुनेछ।
सुदूरपश्चिममा शीर्ष क्रममा विनोद भण्डारीसँगै नयाँ आबद्ध भएका ब्याटरले खेल्न सक्छन्। त्यस्तै इशान पाण्डे र आरिफ शेखले मध्यक्रम सम्हाल्नेछन्। कप्तान दीपेन्द्रसिंह ऐरीसँगै हरमित सिंहको अलराउन्ड प्रदर्शनले सुदूरपश्चिमको गति अघि बढ्न सक्छ। यस्तै अभिनास बोहरा, हेमन्त धामी र स्कट कुगेलिइनले तीव्र गतिको बलिङको युनिट धान्नेछन्।
विराटनगरको शीर्ष क्रमको ब्याटिङमा डु प्लेसिससँगै मार्टिन गप्टिल, जर्ज मन्सी र लोकेश बम हुनेछन्। मध्यक्रममा बसिर अहमद र नारायण जोशी अलराउन्डरको भूमिकामा हुनेछन्। कप्तान सन्दीप लामिछानेलाई सुवास भण्डारी वा सूर्य तामाङले स्पिनमा साथ दिनेछन्। प्रतिश जिसी र मर्स्याङ डि लाङ तीव्र गतिको बलरको रुपमा रहनेछन्।
सुदूरपश्चिम र विराटनगरबीच मंगलबार हुने पहिलो क्वालिफायर खेलको विजेता फाइनल पुग्नेछ। पराजित हुने टोलीले बिहिबार हुने दोस्रो क्वालिफायरमा दोस्रो मौका पाउनेछ।
बुधबार काठमान्डु र लुम्बिनीबीच इलिमिनेटरको खेल हुनेछ। जित हात पार्ने टोली दोस्रो क्वालिफायरमा पुग्नेछ भने हार्ने टोली बाहिरिनेछ। बिहीबार दोस्रो क्वालिफायरको विजेता पनि शनिबार हुने फाइनलमा पुग्नेछ।
विराटनगर किंग्स
सन्दीप लामिछाने (कप्तान), बसिर अहमद, लोकेश बम (विकेटकिपर), सुवास भण्डारी, नरेन भट्ट, मार्स्याङ डी लाङ, फाप डु प्लेसिस, मार्टिन गप्टिल, प्रतीश जीसी, साम हेजलेट, नारायण जोशी, श्रावण किस्कु, जर्ज मुन्से, आयुष न्यौपाने, साहिल पटेल (विकेटकिपर), शङ्कर राना, सूर्य तामाङ।
प्रशिक्षक – धम्मीका प्रसाद (श्रीलंका)
सुदूरपश्चिम रोयल्स
दीपेन्द्रसिंह ऐरी (कप्तान), विनोद भण्डारी (विकेटकिपर), अभिनास बोहरा, दीपक बोहरा (विकेटकिपर), मिलन बोहरा, हेमन्त धामी, हिम्मत महरा, ईशान पाण्डे, टेक रावत (विकेटकिपर), नरेन साउद, आरिफ शेख र दीपेन्द्र थापा (विकेटकिपर), हरमित सिंह, स्कट कुगेइलिन, सेलडन ज्याकसन, मख्तर मानिया, ध्रुव परासर ।
प्रशिक्षक : जगत टमाटा
-1765195916.jpg)
-1746009348.jpg)
