विराटनगर किंग्समाथि ७७ रनरको सानदार जित निकाल्दै सुदूरपश्चिम रोयल्स सिद्धार्थ बैंक नेपाल प्रिमियर लिग (एनपिएल) को फाइनलमा पुगेको छ। सुदूरपश्चिम लगातार दोस्रो सिजन फाइनलमा पुगेको हो।
अघिल्लो सिजनको फाइनलमा भने सुदूरपश्चिमले जनकपुर बोल्ट्ससँग हारेको थियो।
अब उपाधिका लागि सुदूरपश्चिमले शनिबार हुने फाइनलमा दोस्रो क्वालिफायरको विजेतासँग प्रतिस्पर्धा गर्नेछ।
मंगलबार कीर्तिपुरिस्थित त्रिवि मैदानमा भएको पहिलो क्वालिफायरमा सुदूरपश्चिमले विराटनगरको ब्याटिङ लाइनअप कोल्याप्स पारेको थियो।
१५६ रनको लक्ष्य पछ्याएको विराटनगरलाई सुदूरपश्चिमले १४.१ ओभरमा ७८ रनमा अलआउट गर्दै सानदार जित निकाल्यो।
लक्ष्य पछ्याउने क्रममा विराटनगरले सुरूवात अन्त्यन्त खराब रह्यो। विराटनगरले पहिलो सात बलको अन्तरमा तीन विकेट गुमाउँदा संकटमा परेको थियो।
पहिलो ओभरमा साम हिजलेट र मार्टिन गप्टिल आउट भए भने दोस्रो ओभरको पहिलो बलमा नरेन भट्ट पेभिलियन फर्किए।
इनिङको पहिलो बलमा सुदूरपश्चिमका स्कट कुगेइलिनले हिजलेटलाई दीपेन्द्रसिंह ऐरीबाट क्याच गराए। अन्तिम बलमा गप्टिल रनआउट हुनु पुगे। क्रिजमा रहेका फाप डु प्लेसिसले कल बिनै रनका लागि कुदेका गप्टिललाई इशान पाण्डे र कुगेइलिन मिलेर रनआउट गर्दा विराटनर/ले पहिलो ओभरमा ३ रन जोड्दा २ विकेट गुमायो।
दोस्रो ओभरको पहिलो बलमा नरेन भट्टलाई हर्मित सिंहले कुगेइलिनबाट क्याच गराए। जसका कारण विराटनगरले पहिलो सात बलमै ३ विकेट गुमाउँदा ३ रन जोडेको थियो।
त्यसपछि बसिर अहमद चौथो विकेटको रूपमा १२ रन जोडेर आउट भए। उनलाई दीपेन्द्रसिंह ऐरीले सातौं ओभरमा कट एन्ड बउल्ड गरेका थिए।
दुई ओभरपछि लोकेश बम पनि ५ रनमा आउट भएका थिए। त्यतिबेला विराटनगरले ८.२ ओभरमा ५ विकेट गुमाउँदा ५० रन मात्र जोडेको थियो।
अर्को ओभरमा नारायण जोशीलाई हर्मित सिंहले १ रनको स्थितिमा बोल्ड गरेर सुदूरपश्चिमलाई जिततर्फ अघि बढाए।
११औं औभरको पाँचौ र छैटौं बलमा विराटनगरले लगातार विकेट गुमायो। पाँचौ बलमा फाप डु प्लेसिसलाई कुगेइलिनले ३६ रनमा क्याच गराए। सेलडन ज्याक्सनबाट क्याच हुनुअघि डु प्लेसिसले २९ बलमा ३ चौका र १ छक्का प्रहार गर्न सके। अर्को बलमा प्रतिश जिसी ३ रनमा रनआउट भए।
नवौं विकेटको रुपमा मर्स्याङ डि लाङ १५ रनमा क्याच भए। उनलाई १४औं ओभरमा कुगेइलिनले हर्मित सिंहबाट क्याच गराए। त्यसपछि सन्दीप लामिछाने ३ रनमा अन्तिम विकेटको रुपमा आउट भए।
बलिङमा सुदूरपश्चिमका अभिनास बोहरा, कुगेइलिन र हर्मित सिंहले २-२ विकेट लिए।
त्यसअघि टस जितेको विराटनगरले फिल्डिङ रोजेपछि पहिले ब्याटिङ गरेको सुदूरपश्चिमले ७ विकेटको क्षतिमा १५५ रन बनायो।
विराटनगरका लागि ओपनर विनोद भण्डारीले अर्धशतक प्रहार गरे। १९ औं ओभरको अन्तिम बलमा विराटनगरका प्रतिश जिसीको बलमा साम हिजलेटबाट क्याच हुनुअघि भण्डारीले ५२ बलमा ३ चौका र २ छक्काको मद्दतमा ६३ रन बनाए।
अर्का ओपनर मख्तर अहमदले १० रन बनाउन सके। १० बलमा २ चौका प्रहार गरेका उनलाई विराटनगरका मस्याङ डि लाङले तेस्रो ओभरको पाँचौ बलमा बोल्ड गरेका थिए।
त्यसपछि विनोद भण्डारीसँग ४० रनको साझेदारी गरेका भारतीय ब्याटर शेल्डन ज्याकस २० रन बनाएर आउट भए। उनले ११ बलमा २ चौका र १ छक्का प्रहार गरे। उनलाई आठौं ओभरमा सूर्य तामाङले लोकेश बमबाट स्टमपिन गराए।
त्यसपछि इशान पाण्डे १३ रन बनाएर आउट हुन पुगे। पाण्डेलाई साम हिजलेटले बाउन्ड्री लाइनमा नरेन भट्टबाट क्याच गराए। भट्टले बाउन्ड्रीमा असन्तुलन गुमाएपछि बल हावामा फ्याँकेर फेरि बाउन्ड्री भित्र पसेर उत्कृष्ट क्याच लिएका थिए।
त्यसपछि कप्तान दीपेन्द्रसिंह ऐरी १४औं ओभरमा दुई रन लिने क्रममा रनआउट भए। ३ रन बनाएका उनलाई डि लाङले विकेटकिपर लोकेश बमबाट रनआउट गराए। त्यसपछि हर्मित सिंह ११ बलमा २ चौकाको मद्दतमा १४ रन बनाएर आउट भए। प्रतिश जिसीको बलमा हर्मितको क्याच हिजलेटले लिए।
अन्तिम ओभरमा बाउन्ड्रीमा डि लाङको बलमा समातिनुअघि आरिफ शेखले १३ बलमा २० रन बनाए। आरिफले २ चौका र १ छक्का प्रहार गरे।
बलिङमा विराटनगरका मर्स्याङ डि लाङ र प्रतिश जिसीले २-२ विकेट लिए। डि लाङले ४ ओभरमा २३ रन दिँदा प्रतिशले ३ ओभरमा ३१ रन खर्चिए। साम हिजलेट र सूर्य तामाङको नाममा १-१ विकेट रह्यो।
आजको खेलमा पराजित भएको विराटनगरले अब बिहिबार हुने दोस्रो क्वालिफायरमा खेल्नेछ।
अब भोलि बुधबार काठमान्डु र लुम्बिनीबीच इलिमिनेटरको खेल हुनेछ। जित हात पार्ने टोली दोस्रो क्वालिफायरमा पुग्नेछ भने हार्ने टोली बाहिरिनेछ।
बिहीबार दोस्रो क्वालिफायरको विजेता पनि शनिबार हुने फाइनलमा पुग्नेछ।
-1746009348.jpg)
