सिद्धार्थ बैंक नेपाल प्रिमियर लिग (एनपिएल) को दोस्रो सिजनको उपाधि जितेको लुम्बिनी लायन्सको 'च्याम्पियन यात्रा' निकै रोचक रह्यो।
पहिलो खेल जितेर राम्रो सुरूआत गरे पनि लुम्बिनी त्यसपछिका तीन खेलमा लगातार पराजित भएको थियो। त्यसपछि लुम्बिनी यो सिजन पनि संकटमा परेको थियो।
गत सिजन अंक तालिकाको पुछारमा रहेर बाहिरिने पहिलो टोली बनेको लुम्बिनीका लागि यो सिजन पनि अवस्था आएपछि फ्यान मात्र होइन टिम लगानीकर्ताले पनि सामाजिक सञ्जालबाट निराशा व्यक्त गरेका थिए।
तर चौथो खेलपछि प्रत्येक खेल लुम्बिनीका लागि नकआउट जस्तै थियो। एक खेल हारेमा उसको 'खेल खत्तम' हुने स्थिति थियो। तर उसले लिग चरणमा पाँचौं खेल जितेर आशा बढायो। त्यसपछि छैटौं र सातौं खेल जितेर प्लेअफमा स्थान पक्का गर्यो।
यतिमा मात्र रोकिएन लुम्बिनीले, एलिमिनेटरको 'नकआउट खेलमा' काठमान्डु गोर्खाजलाई पाखा लगायो। दोस्रो क्वालिफायरमा विराटनगर किंग्समाथि एकपक्षीय जित निकालेर फाइनलमा स्थान बनायो। फाइनलमा पनि लुम्बिनीको रवाफ उस्तै रह्यो। प्रतियोगिताकै सबभन्दा राम्रो मानिएको सुदूरपश्चिम रोयल्समाथि सहज जित निकाल्यो। लुम्बिनी ६ खेलमा अपराजित रहँदा सिजनको च्याम्पियन बन्न सफल भयो।
लुम्बिनीको च्याम्पियन यात्रामा कप्तान रोहितकुमार पौडेलको ब्याटबाट अर्धशतक त निस्किएन तर उनले सर्वाधिक रन प्रहार गर्ने खेलाडीको दोस्रो स्थानमा तथा नेपाली ब्याटरमा शीर्ष स्थानमा रहे। उनले १० खेलमा २७६ रन प्रहार गरे।
पछिल्ला खेलमा अस्ट्रेलियन ब्याटर डार्शी सटसहित श्रीलंकन विकेटकिपर डिरोशन निक्वेलाले टोलीमा प्रभाव छाडे। स्पिन बलिङमा कप्तान रोहितसँगै शेर मल्ल, अभिशेष गौतम र तिलकराज भण्डारीले एकनासको खेल देखाएर चाहिएको बेलामा विकेट समेत निकाले।
नामिबियाका तीव्र गतिका बलर रुबेल ट्रम्पलम्यात त लुम्बिनीको जितको महत्वपूर्ण सारथी बने। जेजे स्मिटले पनि राम्रो खेले। सन्दीप जोरा र दिलिप नाथको प्रदर्शन भने औषत रह्यो।
शनिबार कीर्तिपुरस्थित त्रिवि मैदानमा भएको उपाधि भिडन्तमा सुदूरपश्चिम रोयल्समाथि ६ विकेटको सानदार जित निकाल्दै लुम्बिनी दोस्रो सिजनको एनपिएलको च्याम्पियन बनेको हो।
गत सिजन अंक तालिकाको पुछारमा रहेको र बाहिरिने पहिलो टोली बनेको लुम्बिनीले दोस्रो सिजनमा भने उपाधि जित्न सफल भएको हो।
यो सिजन पनि लुम्बिनी कुनै समय बाहिरिने संघारमा थियो।
पहिलो खेलमा चितवन राइनोजलाई ६ विकेटले पराजित गरेपछि लुम्बिनी लगातार तीन खेलमा हारेको थियो। लुम्बिनीले दोस्रो खेलमा कर्णालीसँग ९ विकेट, तेस्रो खेलमा काठमान्डुसँग २२ रन र चौथो बेलमा सुदूरपश्चिमसँग ७ विकेटको पराजय भोगेको थियो।
त्यसपछि एक हारले उसको यात्रा सकिने अवस्था थियो। तर उसले त्यसपछि लिग चरणमा पोखरालाई ३ विकेट, विराटनगरलाई ५ विकेट र जनकपुरलाई ४ विकेटले पराजित गरेर अंक तालिकामा चौथो बनेर प्लेअफमा स्थान बनायो।
एलिमिनेटमा लुम्बिनीले काठमान्डुलाई ४ विकेटले हराएर दोस्रो क्वालिफायरमा स्थान बनायो। यस्तै दोस्रो क्वालिफायरमा पनि उसले विराटनगरलाई ४० रनले हराएर फाइनलमा स्थान बनाएको थियो।
फाइनलमा पनि सुदूरपश्चिममाथि जित निकालेर उपाधि जितेर एउटा उत्कृष्ट पुनरागमन गरेको लुम्बिनीले लगातार तीन खेलको पराजयपछि लगातार ६ खेलमा जित निकाल्दै उपाधि जित्यो।
सुदूरपश्चिमले लिग चरणमा ६ खेल जितेर शीर्ष स्थान पक्का गरेको थियो। अन्तिम खेलमा विराटनगरसँग पराजित भए पनि सुदूरपश्चिमले पहिलो क्वालिफायरमा विराटनगरलाई पराजित गरेर फाइनलमा स्थान पक्का गरेको हो।
सुदूरपश्चिमले लिग चरणमा ६ खेल जितेर शीर्ष स्थान पक्का गरेको थियो। अन्तिम खेलमा विराटनगरसँग पराजित भए पनि सुदूरपश्चिमले पहिलो क्वालिफायरमा विराटनगरलाई पराजित गरेर फाइनलमा स्थान बनाएको थियो।
सुदूरपश्चिम लगातार दोस्रो सिजन उपविजेतामै सीमित बन्यो। गत सिजन पनि लिग चरणमा उत्कृष्ट खेलेको सुदूरपश्चिम फाइनलमा भने जनकपुर बोल्ट्ससँग पराजित भएको थियो।
फाइनलमा लुम्बिनीको सजिलो जित
शनिबार उपाधि जित्ने क्रममा लुम्बिनीले सुदूरपश्चिमले दिएको ८६ रनको लक्ष्य ४ विकेटको क्षतिमा ९ ओभरमा पूरा गर्यो।
लुम्बिनीका लागि ओपनर दिनेश अधिकारीले ४२ रन जोडे। पहिलो ओभरमा सुदूरपश्चिमका कप्तान दीपेन्द्रसिंह ऐरीलाई ४ छक्का प्रहार गरेका अधिकारीले १३ बलमा १ चौका र ५ छक्का प्रहार गरे। आक्रामक सुरूआत गरेको लुम्बिनीले अधिकारीको ब्याटिङमा पहिलो ओभरमै ऐरीविरूद्ध २७ रन जोडेको थियो। उनी पाँचौं ओभरमा हेमन्त धामीको बलमा स्कट कुगेइलिनबाट क्याच भए।
अर्का ओपरन डार्शी शर्टले धामीबाट बोल्ड हुनुअघि १४ रन बनाए। उनले १३ बलमा ३ चौका प्रहार गरे। उनी दिनेश अधिकारी आउट भएको दुई बलअघि आउट भएका थिए।
दीपेन्द्रसिंह ऐरीले नवौं ओभरमा दुई विकेट लिएका थिए। उनले लुम्बिनीका कप्तान रोहितकुमार पौडेललाई १६ रन र सन्दीप जोरालाई शून्यमा आउट गरेका थिए। तर यो विकेटमा सुदूरपश्चिमले खुसी मनाउन सकेन किनकी त्यतिबेला लुम्बिनी जित नजिक पुगिसकेको थियो। बलिङमा हेमन्त र ऐरीले २-२ विकेट लिए।
लुम्बिनीको स्पिनमा घुमेको सुदूरपश्चिम
टस जितेर पहिले ब्याटिङ गरेको सुदूरपश्चिम रोयल्सले खराब ब्याटिङ गर्यो। जसका कारण सुदूरपश्चिम १९.१ ओभरमा ८५ रनमै अलआउट हुन बाध्य भयो।
लगातार विकेट गुमाएको सुदूरपश्चिमविरूद्ध लुम्बिनीका कप्तान रोहितकुमार पौडेलले ह्याट्रिक गरे। रोहितको ह्याट्रिकसँगै सुदूरपश्चिम संकटमा परेको थियो।
रोहितले ११ औं ओभरको अन्तिम तीन बलमा ह्याट्रिक गरेका थिए। यो सिजनको दोस्रो ह्याट्रिक हो। यसअघि काठमान्डु गोर्खाजका शाहब आलमले पनि ह्याट्रिक गरेका थिए।
रोहितले ११औं ओभरको चौथो बलमा सुदूरपश्चिमका कप्तान दीपेन्द्रसिंह ऐरीलाई रुबेन ट्रम्पलम्यानबाट क्याच गराए। दीपेन्द्रले २० बलमा १३ रन जोड्न सके।
पाँचौं बलमा रोहितले दीपक बोहरालाई सन्दीप जोराबाट क्याच गराउँदै डकआउट गरे। छैटौं बलमा पुनित मेहरा रोहितको एलबिडब्लूको धरापमा परे।
रोहितले ह्याट्रिक गरेसँगै सुदूरपश्चिमले ११ ओभरमा ४४ रन जोड्दा ६ विकेट गुमाएको थियो। यस्तै उसले १४ ओभर चल्दै गर्दा ५० रन पूरा गर्न सकेको थियो।
लगातार विकेट गुमाएको सुदूरपश्चिमले सातौं विकेट १५औं ओभरमा गुमायो। उसका हर्मित सिंह १० रन बनाएर आउट भए। १५ औं ओभरको तेस्रो बलमा शेर मल्ललाई छक्का प्रहार गरेका उनी अर्को बलमा डार्शी शर्टबाट क्याच भए।
सुदूरपश्चिमका लागि सर्वाधिक रन प्रहार गरेका इशान पाण्डेले ३३ रन बनाउन सके।
आज ओपनिङमा आएका पाण्डेले ५१ बल खेल्दा १ चौका मात्र प्रहार गर्न सके। १७ औं ओभरसम्म टिकेका उनी यो ओभरको तेस्रो बलमा आउट भएका थिए। उनलाई लुम्बिनीका शेर मल्लले मोबिन सुभसिंहबाट क्याच गराएका थिए।
त्यसअघि सुदूरपश्चिम पहिलो ओभरमै ओपनर विनोद भण्डारीलाई गुमाएको थियो। उनी ट्रम्पलम्यानको बलमा दिनेश अधिकारीबाट क्या हुँदा डकआउट भएर पेभिलियन फर्किए। तेस्रो ओभरमा ट्रम्पलम्यानले अर्को विकेट लियो। उनले भारतीय ब्याटर सेल्डन ज्याकसनलाई १ रनमै एलबिडब्लूको धरापमा पारे।
पावरप्लेमा तेस्रो विकेट लिने क्रममा लुम्बिनीले आरिफ शेखको पनि विकेट लियो। आरिफलाई पाँचौं ओभरमा शेर मल्लले ६ रन बनाएर खेलिरहँदा एलबिडब्लूको धरापमा पारेका थिए।
अन्तिममा स्कट कुगेइलिन पनि १० रनमै आउट भए। १९ औं ओभरमा तिलकाराज भण्डारीको बलमा सन्दीप जोराबाट समातिए। आउट हुनुअघि उनले १ छक्का प्रहार गरे। अन्तिम विकेटको रूपममा अभिनास बोहरालाई १ रन ट्रम्पलम्यानले अन्तिम ओभरको पहिलो बलमा डार्शी शर्टबाट क्याच गराएसँगै सुदूरपश्चिम ८५ रनमै अलआउट हुनु पुग्यो। हेमन्त धामी ७ रनमा नटआउट रहे।
बलिङमा लुम्बिनीका तीन बलरले ३-३ विकेट लिए। ट्रम्पलम्यान, रोहित र शेर मल्लको नाममा ३-३ विकेट रह्यो। ४-४ ओभरमा बलिङ गर्दा रोहितले १२ रन र शेरले १८ रन खर्चिए। ट्रम्पलम्यानले २.१ ओभरमा ३ रन मात्र दिए। तिलकराज भण्डारीको नाममा १ विकेट रह्यो।
खेलका लागि लुम्बिनीले जेजे स्मितको स्थानमा मोबिन सुभसिंहलाई खेलाएको छ। सुदूरपश्चिमले दुई परिवर्तन गरेको थियो। मिलन बोहराको स्थानमा दिपक बोहरा तथा मुख्यर अहमदको स्थानमा पुनित मेहरा आएका थिए।
सुदूरपश्चिम रोयल्स
दीपेन्द्रसिंह ऐरी (कप्तान), आरिफ शेख, अभिनास बोहरा, इशान पाण्डे, दिपक बोहरा, विनोद भण्डारी, हेमन्त धामी, हरमीत सिंह, सेलडन ज्याक्सन, स्कट कुगेलिइन, पुनित मेहरा।
लुम्बिनी लायन्स
रोहित पौडेल (कप्तानी) सन्दीप जोरा, दिलिप नाथ, शेर मल्ल, अभिशेष गौतम, दिनेश अधिकारी, तिलकराज भण्डारी, मोबिन सुभसिंहा, रूबेन ट्रम्पलम्यान, निरोशन डिक्वेला (विकेटकिपर), डार्शी शर्ट।
शेर मल्लले जिते लगातार दोस्रो उपाधि
लुम्बिनी लायन्सका स्पिनर शेर मल्ल र सुदूरपश्चिमका तीव्र गतिका बलर हेमन्त धामीले गत सिजन जनकपुरका लागि उपाधि जितेका थिए।
यो सिजनका लागि जनकपुरले रिलज गरेसँगै मिनिअक्सनबाट हेमन्तलाई सुदूरपश्चिम र शेरलाई लुम्बिनीयले भित्र्याएका थिए। यो सिजन लुम्बिनी आएसँगै शेरले दोस्रो उपाधि जितेका हुन्।
मल्लले सिजन लुम्बिनीलाई च्याम्पियन बनाउन महत्वपूर्ण भूमिका निर्वाह गरे। उनले १० खेलमा १७ विकेट लिए।
फाइनलमा ३ विकेट लिएका मल्ल सर्वाधिक विकेट लिने बलरको सूचीमा सन्दीप लामिछानेसँगै शीर्ष स्थानमा रहन सफल भए।
उनलाई भारतीय कमेन्टेटर आकाश चोपडाले आइपिएल खेल्न सक्ने बलरको रूपमा चित्रित गरेका थिए। यस्तै काठमान्डु गोर्खाज तथा नेपाली राष्ट्रिय टोलीका पूर्वप्रशिक्षक मोन्टी देसाइले पनि उनको प्रशंसा गरेका थिए।
-1763886130.jpeg)
-1746009348.jpg)
