युनिस विक्रम ठकुरीको घातक बलिङ र हुसेन तलातको उत्कृष्ट प्रदर्शनमा कर्णाली याक्सले नेपाल प्रिमियर लिग (एनपिएल) मा जनकपुर बोल्ट्सलाई १९ रनले पराजित गरेको छ।
त्रिवि क्रिकेट मैदानमा मंगलबार भएको खेलमा कर्णालीले दिएको १३३ रनको लक्ष्य पछ्याएको पहिलो संस्करणको विजेता जनकपुर १९.३ ओभरमा ११३ रनमा अलआउट भयो।
कर्णालीले ब्याटिङमा सामान्य योगफल बनाए पनि कसिलो बलिङ गर्दै प्रतियोगितामा जित निकालेको हो।
जनकपुरको ब्याटिङ सुरुदेखि नै दबाबमा परेको थियो। कर्णालीका बलरले नियमित अन्तरालमा विकेट लिँदा जनकपुरले लक्ष्य पछ्याउन सकेन।
विशेषगरी युनिस विक्रम ठकुरीले १५औँ ओभरमा लगातार दुई बलमा विकेट लिँदै मेडन ओभर फ्याँकेपछि खेल कर्णालीको पक्षमा मोडियो।
युनिसको एकै ओभरमा दुई विकेट
जनकपुरका लागि मयन यादवले ११ बलमा दुई छक्कासहित १४ रन बनाए। तर तृतराज दास तीन बलमा एक रन बनाएर सोमपाल कामीको बलमा आउट भए। मयन रनआउट भएपछि जनकपुरले १६ रनमा दोस्रो विकेट गुमायो।
मोइन अलीले २२ बलमा एक चौका र एक छक्कासहित १९ रन बनाए। अनिल साहले १७ बलमा ११ रन जोडे। मोइन ३७ रनको स्कोरमा आउट भएपछि जनकपुर थप दबाबमा परेको थियो।
कुशल परेरा चार बलमा एक चौकासहित ६ रन बनाएर फर्किए। त्यसपछि जिमी निशम र कप्तान हरमित सिंहले केही समय इनिङ सम्हाल्ने प्रयास गरे।
निशमले १४ बलमा एक चौकासहित १५ रन बनाए। हरमितले १३ बलमा दुई चौकासहित १९ रन जोडे। उनीहरूबाट जनकपुरले आशा गरे पनि कर्णालीका बलरले साझेदारी लामो हुन दिएनन्।
युनिस विक्रम ठकुरीले १५औँ ओभरको पहिलो बलमा जिमी निशमलाई अरिफुल इस्लामबाट क्याच गराए। दोस्रो बलमा उनले आदित्य महतालाई डकआउट गरे। त्यस ओभरमा कुनै रन नदिई लगातार दुई विकेट लिएपछि जनकपुरको जितको सम्भावना कमजोर बन्यो। अघिल्लो ओभरमा उनले हरमित सिंहलाई क्याच आउट गराए।
अभिषेक तिवारीले १७ बलमा दुई छक्कासहित २० रन बनाएर केही आशा जगाए पनि अन्य ब्याटरले साथ दिन सकेनन्। राहुल यादव एक र ललित राजवंशी एक रनमा आउट भए।
हुसेन तलातका तीन विकेट
कर्णालीका लागि युनिस विक्रम ठकुरी र हुसेन तलातले समान तीन विकेट लिए। युनिसले चार ओभरमा एक मेडनसहित २२ रन खर्चिए। तलातले चार ओभरमा २६ रन दिए।
नन्दन यादवले २.३ ओभरमा १३ रन खर्चेर दुई विकेट लिए। सोमपाल कामीले एक विकेट हात पारे। मार्क वाट र पवन सर्राफले विकेट लिन सकेनन्।
कर्णालीले बनाएको थियो १३२ रन
यसअघि टस हारेर पहिले ब्याटिङ गरेको कर्णालीले निर्धारित २० ओभरमा नौ विकेट गुमाएर १३२ रन बनाएको थियो।
कर्णालीका लागि अरिफुल इस्लामले सर्वाधिक ४३ रन बनाए। उनले २९ बलमा चार छक्का प्रहार गरे। पवन सर्राफले ३७ बलमा तीन छक्कासहित ३७ रन जोडे।
अरिफुल र पवनले चौथो विकेटका लागि ४२ रनको साझेदारी गरेका थिए। अरिफुल १२.१ ओभरमा आउट हुँदा कर्णालीको स्कोर ७९ रन थियो। त्यसपछि पवनले तल्लो क्रमका ब्याटरसँग रन जोड्दै टोलीलाई १३२ सम्म पुर्याए।
दीपक डुम्रेले पाँच बलमा दुई छक्कासहित १३ रन बनाए। गुल्सन झाले नौ बलमा एक चौका र एक छक्कासहित १२ रन जोडे। नन्दन यादवले नौ रन बनाए। मार्क वाट एक, हुसेन तलात तीन, अकबर अली एक र कप्तान सोमपाल कामी एक रनमा आउट भए। युवराज खत्री एक र युनिस विक्रम ठकुरी शून्यमा अविजित रहे।
१६ वर्षीय राहुल यादवको डेब्यूमै प्रभाव
जनकपुरका लागि १६ वर्षीय राहुल यादवले एनपिएलमा डेब्यू गर्दै बलिङमा प्रभावशाली प्रदर्शन गरे। जनकपुरको ट्यालेन्ट हन्टबाट छनोट भएका उनले चार ओभरमा १५ रन खर्चेर दुई विकेट लिए।
राहुलले दीपक डुम्रे र हुसेन तलातलाई आउट गरेका थिए। उनको इकोनोमी ३.७५ रह्यो। कप्तान हरमित सिंहले पनि चार ओभरमा एक मेडनसहित २२ रन खर्चेर तीन विकेट लिए। मोइन अलीले दुई तथा ललित राजवंशीले एक विकेट लिए पनि जनकपुरलाई जित दिलाउन पर्याप्त भएन।
