नेपाल प्रिमियर लिग (एनपिएल) को दोस्रो क्वालिफायरमा चितवन राइनोजले सुदूरपश्चिम रोयल्सविरुद्ध टस जितेर पहिले ब्याटिङ गर्ने निर्णय गरेको छ।
त्रिवि क्रिकेट मैदान कीर्तिपुरमा बिहीबार साँझ ५ बजे सुरु हुने खेलमा चितवनले काठमाडौं गोर्खाजविरूद्ध एलिमिनेटरमा उत्रिएको टोलीलाई निरन्तता दिएको छ। यता सुदूरपश्चिमले भने दुई खेलाडी परिवर्तन गरेको छ।
सुदूरपश्चिमले अभिनास बोहरा र थानुका मधुसुधनको स्थानमा दीपक बोहरा र फाबियन एलेनलाई प्लेइङ ११ मा समेटेको छ।
चितवनले कप्तान रवि बोपाराको नेतृत्वमा कुशल मल्ल, रिजन ढकाल, कमलसिंह ऐरी, देव खनाल, विवेककुमार यादव, रन्जित कुमार, सलाउद्दीन खान, कमिल मिरशा, उस्मा मीर र डेभिड मलानलाई मैदान उतार्नेछ।
यस्तै, दीपेन्द्रसिंह ऐरीको कप्तानीमा रहेको सुदूरपश्चिमको टोलीमा विनोद भण्डारी, फाबियन एलेन, आरिफ शेख, इशान पाण्डे, थारिन्दु रत्नायके, स्कट कुगेलेइन, अनिल खरेल, हेमन्त धामी, दीपक बोहरा र जर्ज मुन्से छन्।
पहिलो क्वालिफायरमा लुम्बिनी लायन्ससँग पराजित भएपछि सुदूरपश्चिमले फाइनल प्रवेशका लागि दोस्रो क्वालिफायर खेल्न लागेको हो। चितवनले भने बुधबार भएको एलिमिनेटरमा काठमाडौं गोर्खाजलाई पराजित गर्दै दोस्रो क्वालिफायरमा स्थान बनाएको थियो।
लिग चरणको भेटमा सुदूरपश्चिमले चितवनलाई ५ विकेटले पराजित गरेको थियो। त्यसैले चितवनसँग उक्त हारको बदला लिने अवसर छ भने सुदूरपश्चिम दोस्रो भेटमा पनि जित निकाल्दै लगातार दोस्रो पटक फाइनल पुग्ने लक्ष्यमा हुनेछ।
दोस्रो क्वालिफायरको विजेताले शनिबार हुने फाइनलमा उपाधिका लागि लुम्बिनी लायन्ससँग प्रतिस्पर्धा गर्नेछ।