नेपाल प्रिमियर लिग (एनपिएल) मा कीर्तिमानी शतक प्रहार गर्दै चितवन राइनोजलाई दोस्रो क्वालिफायरमा पुर्याएका कमिल मिसराले आफ्नो शतकीय इनिङ्स टोलीलाई समर्पित गरेका छन्।
काठमाडौं गोर्खाजलाई एलिमिनेटरमा ६१ रनले पराजित गरेपछि प्रतिक्रिया दिँदै श्रीलंकाका २५ वर्षीय क्रिकेटर मिसराले आफ्नो प्रदर्शनमा टोलीका साथीहरू र राइनोजका समर्थकहरूको ठूलो भूमिका रहेको बताए। उनले खेलमा ५९ बलमा नटआउट १२० रन बनाएका थिए। यो एनपिएलको व्यक्तिगत सर्वाधिक स्कोर हो।
खेलमा चितवनले सुरुआतमै दुई विकेट गुमाएको अवस्थाबाट आफूले इनिङ्स सम्हाल्नुपरेको उनले बताए। त्यसपछि कप्तान रवि बोपारासँगको साझेदारीले खेललाई सही दिशामा अगाडि बढाउन सहयोग गरेको उनको भनाइ थियो।
‘दुई विकेट गुमाएपछि रविसँग मिलेर लामो समय क्रिजमा टिकेर खेल्ने योजना बनायौँ। हामीले इनिङ्सलाई अगाडि लैजान चाहेका थियौँ,’ उनले भने।
मिसराले बोपारासँग तेस्रो विकेटका लागि १५४ रनको साझेदारी गरेका थिए। यही साझेदारी चितवनको विशाल योगफलको आधार बनेको थियो।
उनले व्यक्तिगत उपलब्धिभन्दा टोलीको प्रदर्शनलाई प्राथमिकता दिएको पनि बताए। आगामी खेलमा कुन टोली प्रतिद्वन्द्वी हुन्छ भन्ने कुराभन्दा आफ्नो टोलीले कस्तो क्रिकेट खेल्छ भन्नेमा ध्यान दिने उनको भनाइ थियो।
लगातार दुई दिन खेल्नुपर्ने चुनौतीबारे बोल्दै मिसराले थकान व्यवस्थापन गर्नुपर्ने स्वीकार गरे। तर, फाइनल पुग्ने लक्ष्यका साथ टोलीले त्यसलाई व्यवस्थापन गर्ने विश्वास व्यक्त गरे।
एनपिएलमा पहिलो शतक प्रहार गर्दाको अनुभवबारे उनले ९० रन पार गरेपछि पनि आफूलाई दबाब महसुस नभएको बताए।
‘९० रन पुगेपछि शतक बनाउने विषयमा म नर्भस थिइनँ। मेरो ध्यान टोलीका लागि रन बनाउने र आफ्नो जिम्मेवारी पूरा गर्नेमा थियो। विकेट पनि राम्रो थियो, त्यसैले अवसरको सदुपयोग गर्न सकेँ,’ उनले भने।
मिसराले यसअघि पनि राम्रो सुरुआत पाएर ठूलो इनिङ्समा परिणत गर्न नसकेको उल्लेख गर्दै यसपटक अवसरलाई सदुपयोग गर्न सकेको बताए।
उनले आफ्नो प्रदर्शन चितवनका सबै खेलाडी र आफ्नो क्रिकेट यात्रामा निरन्तर साथ दिँदै आएका राइनोजका समर्थकहरूलाई समर्पित गरे।
मिसराको कीर्तिमानी १२० रनको मद्दतमा चितवनले काठमाडौंविरुद्ध २० ओभरमा ४ विकेट गुमाएर २०४ रन बनाएको थियो। जवाफमा काठमाडौं १४३ रनमा समेटिएपछि चितवन ६१ रनले विजयी भएको थियो।
अब चितवनले बिहीबार दोस्रो क्वालिफायरमा सुदूरपश्चिम रोयल्ससँग खेल्नेछ। उक्त खेल जिते चितवन पहिलोपटक एनपिएलको फाइनल पुग्नेछ। फाइनलमा यसअघि नै स्थान बनाइसकेको लुम्बिनी लायन्ससँग उपाधिका लागि प्रतिस्पर्धा गर्ने अवसर चितवनलाई हुनेछ।